យោងតាមការចុះផ្សាយពីប្រភពបរទេស ជារឿយៗ យើងតែងតែប្រញាប់បោះបន្លែផ្លែឈើចោលភ្លាមៗ នៅពេលឃើញមានស្នាមអុជខ្មៅ ឬប្រែពណ៌បន្តិចបន្តួច ប៉ុន្តែតាមពិតទៅ ស្នាមទាំងនោះភាគច្រើនគ្រាន់តែជាយន្តការការពារខ្លួនធម្មជាតិរបស់រុក្ខជាតិ ដែលមិនប៉ះពាល់ដល់រសជាតិ ឬសុខភាពឡើយ។
ជាក់ស្តែង ស្នាមអុជខ្មៅតូចៗលើសំបកក្រូច ឬក្រូចឆ្មារ គ្រាន់តែជាប្រតិកម្មខាងក្រៅនៃសំបកដែលរងការទិចពីសត្វល្អិត ឬការកកិតប៉ុណ្ណោះ ដរាបណាផ្លែឈើនោះនៅមានក្លិនក្រអូបស្រស់ថ្លា និងសាច់ខាងក្នុងមិនទាន់រលួយជោទឹក អ្នកនៅតែអាចទទួលទានវាបានយ៉ាងមានសុវត្ថិភាព។
បន្ថែមពីលើនេះ មានលក្ខណៈបន្លែជាច្រើនដែលមនុស្សភាគច្រើនតែងយល់ច្រឡំថាខូច ដូចជាម្សៅសៗលើសំបកស្ពៃក្ដោបដែលជាសារធាតុក្រមួនធម្មជាតិសម្រាប់ការពារការបាត់បង់ជាតិទឹក ឬសរសៃសៗដូចសំឡីលើផ្ទាំងផ្សិតដែលជាផ្នែកមួយនៃការលូតលាស់របស់វា និងមិនមែនជាផ្សិតដុះដែលបង្កគ្រោះថ្នាក់ឡើយ។ សូម្បីតែផ្សិតដែលមានសម្រកខ្មៅក្រោមមួក ក៏ជាសញ្ញានៃការលូតលាស់ពេញលេញដែលផ្ដល់រសជាតិឈ្ងុយឆ្ងាញ់បំផុតផងដែរ។ ដើម្បីសម្រេចចិត្តឱ្យបានត្រឹមត្រូវ អ្នកគ្រាន់តែប្រើការសង្កេតលើក្លិន និងការប៉ះ បើបន្លែមិនមានក្លិនស្អុយជូរ មិនមានជាតិរំអិលស្អិត ឬមិនទន់ជ្រាយខ្លាំង គឺវាជារបស់ល្អដែលមិនគួរខ្ជះខ្ជាយបោះចោលដោយឥតប្រយោជន៍នោះទេ៕