យោងតាមការចុះផ្សាយពីប្រភពបរទេស ក្រែមលាបមាត់គឺជាជំនួយការដ៏សំខាន់សម្រាប់បង្កើនភាពជឿជាក់ ប៉ុន្តែកំហុសឆ្គងតូចតាចមួយចំនួនអាចធ្វើឱ្យសម្រស់ផ្ទៃមុខទាំងមូលបាត់បង់តុល្យភាព។
កំហុសដំបូងគេដែលមហាជនតែងជួបប្រទះ គឺការលាបក្រែមទាំងដែលបបូរមាត់ស្ងួតរបក ដែលវិធីដោះស្រាយដ៏ល្អបំផុតគឺការខាត់កោសិកាចាស់ៗចេញ ១ ទៅ ២ ដងក្នុងមួយសប្តាហ៍ និងការលាបក្រែមថែរក្សាសំណើមជាមុនជានិច្ច។ បន្ទាប់មក គឺការជ្រើសរើសពណ៌ក្រែមដែលមិនស៊ីជាមួយសម្បុរស្បែក ដែលអាចធ្វើឱ្យមុខមើលទៅស្រអាប់ ដូច្នេះអ្នកគួរជ្រើសរើសពណ៌ផ្កាឈូកស្រាលសម្រាប់ស្បែកស និងពណ៌ទឹកក្រូចឥដ្ឋ ឬក្រហមក្រមៅសម្រាប់ស្បែកស្រអែម ដើម្បីជួយលើកសម្រស់ឱ្យកាន់តែលេចធ្លោ។
ក្រៅពីការជ្រើសរើសពណ៌ ការប្រើខ្មៅដៃគូសវង់បបូរមាត់ក៏ជារឿងមិនអាចខ្វះបានដែរ ដើម្បីបង្ការកុំឱ្យក្រែមហូរចេញក្រៅ និងជួយឱ្យបបូរមាត់មានរាងស្អាត។ អ្នកមិនគួរលាបក្រែមក្រាស់ជាន់គ្នាខ្លាំងពេកឡើយ ព្រោះវាអាចបង្កជាដុំកកមិនស្អាត ហើយក្រោយពេលលាបរួច អ្នកគួរប្រើក្រដាសជូតមាត់ជម្រះជាតិក្រែមលើសចេញបន្តិច ដើម្បីការពារកុំឱ្យក្រែមជាប់ធ្មេញ ឬប្រឡាក់រញ៉េរញ៉ៃ។ ជាមួយគ្នានេះ ការលាបក្រែមឱ្យសមស្របតាមទម្រង់មាត់ និងកាលៈទេសៈក៏សំខាន់ដែរ ដូចជាការប្រើពណ៌ស្រាលសមរម្យសម្រាប់ពេលធ្វើការ និងពណ៌ក្រហមឆើតឆាយសម្រាប់កម្មវិធីជប់លៀងពេលរាត្រីជាដើម។
ជាចុងក្រោយ ការថែរក្សាគុណភាពក្រែមដោយទុកក្នុងកន្លែងត្រជាក់ និងជៀសឆ្ងាយពីកម្ដៅថ្ងៃ គឺជាវិធីជួយឱ្យក្រែមរក្សាពណ៌បានស្អាត និងមិនមានបាក់តេរី។ អ្វីដែលសំខាន់បំផុតនោះ គឺភាពជឿជាក់លើខ្លួនឯងក្នុងការសាកល្បងពណ៌ថ្មីៗ និងការហ្វឹកហាត់លាបឱ្យបានស្ទាត់ជំនាញ។ ប្រសិនបើអ្នកអាចជៀសវាងកំហុសទាំងនេះបាន នោះបបូរមាត់របស់អ្នកនឹងមានភាពស្រស់ស្អាត ទាក់ទាញ និងមានមន្តស្នេហ៍ពេញមួយថ្ងៃដោយមិនបាច់បារម្ភឡើយ៕