យោងតាមការចុះផ្សាយពីប្រភពបរទេស ជំនឿដែលថាការញ៉ាំអាហារសមុទ្រដូចជា បង្កង ល្មាស់ ឬមឹក គឺជាមូលហេតុចម្បងធ្វើឱ្យតំបន់សម្ងាត់ស្ត្រីមានក្លិនឆ្អាង គឺជាការយល់ច្រឡំដែលត្រូវបានគេជឿតៗគ្នាមកជាយូរ។ តាមការពិតបែបវិទ្យាសាស្ត្រ អាហារសមុទ្រមិនមែនជាជនជាប់ចោទពិតប្រាកដឡើយ ប៉ុន្តែគឺ “ទឹកជ្រលក់” និងគ្រឿងផ្សំដទៃទៀតទៅវិញទេ ដែលជាអ្នកបង្កបញ្ហា។
ក្លិនធម្មជាតិនៃតំបន់សម្ងាត់កើតចេញពីតុល្យភាពបាក់តេរីល្អ ប៉ុន្តែវាអាចប្រែប្រួលទៅតាមរបបអាហារដែលយើងញ៉ាំចូលទៅ ជាពិសេសគ្រឿងទេសដែលមានក្លិនឆ្អេះឆ្អាបដូចជា ខ្ទឹមស ខ្ទឹមក្រហម និងគ្រឿងការី ដែលមានសារធាតុក្ពាន់ធ័រ។ នៅពេលរាងកាយរំលាយអាហារទាំងនេះ សារធាតុទាំងនោះនឹងត្រូវបញ្ចេញមកក្រៅតាមរយៈញើស និងទឹកដែលហូរចេញពីតំបន់សម្ងាត់ ចំណែកអាហារផ្អាប់ និងប្រហុក ដែលសម្បូរទៅដោយសូដ្យូមខ្ពស់ ក៏ធ្វើឱ្យរាងកាយខ្វះជាតិទឹក និងបង្កើនកំហាប់ក្លិនឱ្យកាន់តែខ្លាំងផងដែរ។
ដើម្បីបង្កើនទំនុកចិត្ត និងរក្សាសុខភាពតំបន់សម្ងាត់ឱ្យបានល្អ អ្នកគួរបរិភោគទឹកស្អាតឱ្យបានច្រើនដើម្បីជួយពង្រាវក្លិន ចៀសវាងការលាងសម្អាតដោយប្រើសាប៊ូខ្លាំងៗនៅខាងក្នុង និងជ្រើសរើសខោក្នុងដែលខ្យល់អាចចេញចូលបានល្អ។ ការកាត់បន្ថយអាហារដែលមានជាតិស្ករខ្ពស់ក៏ជាចំណុចសំខាន់ ព្រោះស្ករគឺជាចំណីដ៏ល្អសម្រាប់មេរោគផ្សិតដែលបណ្ដាលឱ្យមានធ្លាក់ស និងក្លិនផ្អូមមិនល្អ។
ទោះជាយ៉ាងណា ប្រសិនបើអ្នកសង្កេតឃើញសញ្ញាគ្រោះថ្នាក់ដូចជា ក្លិនស្អុយខ្លាំងខុសធម្មតា មានអាការៈរមាស់ ក្រហាយ ឬធ្លាក់សមានពណ៌បៃតង ឬលឿង អ្នកគួរតែទៅពិគ្រោះជាមួយគ្រូពេទ្យជំនាញជាបន្ទាន់ ព្រោះវាអាចជាសញ្ញានៃការឆ្លងមេរោគដែលមិនអាចព្យាបាលបានដោយគ្រាន់តែការតមចំណីអាហារនោះឡើយ៕