យោងតាមការផ្សាយពីប្រភពបរទេស នៅពេលមានជំងឺ មនុស្សភាគច្រើនតែងយល់ថាការញ៉ាំអាហារទន់ៗ ឬផ្លែឈើគឺជាជម្រើសដ៏ល្អបំផុតដើម្បីងើបពីឈឺ ប៉ុន្តែលោកវេជ្ជបណ្ឌិតអ្នកជំនាញជនជាតិជប៉ុន ១រូប បានបង្ហាញទិន្នន័យគួរឱ្យភ្ញាក់ផ្អើលថា អាហារដែលយើងគិតថា “ល្អ” ទាំងនោះ អាចផ្ដល់ផលអវិជ្ជមាន និងធ្វើឱ្យរាងកាយកាន់តែហត់នឿយទៅវិញ។
អាហារដំបូងដែលគួរប្រុងប្រយ័ត្នគឺបបររាវៗ ព្រោះទោះបីវាផ្ដល់ភាពងាយស្រួលក្នុងការទំពារ ប៉ុន្តែវាសម្បូរទៅដោយកាបូអ៊ីដ្រាតដែលរាងកាយបឺតស្រូបលឿនពេក បង្កឱ្យកម្រិតជាតិស្ករក្នុងឈាមឡើងខ្ពស់ភ្លាមៗ និងធ្វើឱ្យអ្នកជំងឺកាន់តែមានអារម្មណ៍អស់កម្លាំងជាងមុន ខណៈដែលប្រព័ន្ធរំលាយអាហារកំពុងចុះខ្សោយ។
បន្ទាប់មកគឺមីអ៊ុដុង ឬអាហារធ្វើពីម្សៅដែលមានជាតិគ្លុយតេនខ្ពស់ ដែលអាចបង្កឱ្យហើមពោះ ឬរាករូស ជាពិសេសចំពោះអ្នកដែលមានបញ្ហាក្រពះស្រាប់។ ចំណែកឯអាហារទីបីដែលគួរជៀសវាងគឺផ្លែឈើ ព្រោះជាតិស្ករហ្វ្រុចតូសក្នុងផ្លែឈើអាចបង្កើតបន្ទុកធ្ងន់ដល់ថ្លើមដែលកំពុងតែហត់នឿយ ហើយផ្លែឈើដែលមានធាតុត្រជាក់អាចទៅរំញោចប្រព័ន្ធរំលាយអាហារឱ្យកាន់តែមានអាការៈរាករូសថែមទៀត។
លោកវេជ្ជបណ្ឌិតបានបញ្ជាក់ថា អ្វីដែលសំខាន់បំផុតពេលឈឺគឺការសម្រាកឱ្យបានគ្រប់គ្រាន់ និងការផឹកទឹកក្ដៅឧណ្ហៗ ហើយប្រសិនបើចង់ញ៉ាំអាហារ គួរជ្រើសរើសមុខម្ហូបងាយៗដូចជា ស៊ុបមីសូ តៅហ៊ូ ឬសាច់ត្រីទឹកសាបក្នុងបរិមាណតិចតួច ដើម្បីជួយឱ្យរាងកាយងើបឡើងវិញបានឆាប់រហ័ស៕