ការទទួលទានអាហារដែលមានជីវជាតិ គឺជាផ្នែកមួយនៃសុខភាព ប៉ុន្តែ ទម្លាប់ក្រោយការញ៉ាំ ក៏សំខាន់មិនចាញ់គ្នាដែរ ។ មនុស្សភាគច្រើនតែងតែធ្វើរឿងមួយចំនួនដោយភាពស៊ាំធ្លាប់ ប៉ុន្តែយោងតាមការសិក្សាបែបវិទ្យាសាស្ត្រ និងសុខាភិបាល ការធ្វើសកម្មភាពទាំង ៣ ខាងក្រោមនេះភ្លាមៗក្រោយញ៉ាំបាយឆ្អែត អាចបង្កផលប៉ះពាល់ធ្ងន់ធ្ងរដល់រាងកាយ៖
១. ការចូលគេង ឬទម្រេតខ្លួនភ្លាមៗ
នេះគឺ ជាទម្លាប់ដែលមនុស្សភាគច្រើនចូលចិត្តធ្វើបំផុត ជាពិសេសក្រោយញ៉ាំបាយថ្ងៃត្រង់ ឬបាយល្ងាចឆ្អែតខ្លាំង ។
-ផលប៉ះពាល់៖ នៅពេលយើងដេក រាងកាយមិនស្ថិតក្នុងស្ថានភាពបញ្ឈរ ដែលធ្វើឱ្យអាស៊ីតក្នុងក្រពះងាយនឹងច្រាលឡើងមកលើ (Acid Reflux) តាមបំពង់អាហារ។ វាបង្កឱ្យមានអាការៈក្រហាយទ្រូង ភើមកជូរ និងធ្វើឱ្យប្រព័ន្ធរំលាយអាហារដំណើរការមិនបានល្អ។
–គួររង់ចាំយ៉ាងហោចណាស់ ២ ទៅ ៣ ម៉ោង ក្រោយញ៉ាំបាយ ទើបអាចចូលគេងបាន ។
២. ការងូតទឹកភ្លាមៗ
មនុស្សមួយចំនួនចូលចិត្តងូតទឹកក្រោយញ៉ាំបាយ ដើម្បីឱ្យមានអារម្មណ៍ស្រស់ស្រាយ ប៉ុន្តែវាជារឿងខុសឆ្គងបច្ចេកទេសសុខភាព។
-ផលប៉ះពាល់៖ នៅពេលយើងងូតទឹក សីតុណ្ហភាពរាងកាយនឹងប្រែប្រួល ដែលបង្ខំឱ្យរាងកាយបញ្ជូនឈាមទៅកាន់ស្បែក និងចុងដៃចុងជើង ដើម្បីរក្សាកម្ដៅ។ នៅពេលឈាមត្រូវបង្វែរចេញពីក្រពះ វានឹងធ្វើឱ្យប្រព័ន្ធរំលាយអាហារខ្សោយ ចុកពោះ ឬតឹងពោះខ្លាំង។
–គួរទុកពេលយ៉ាងតិច ៣០ ទៅ ៤៥ នាទី ក្រោយញ៉ាំបាយ ទើបចាប់ផ្ដើមងូតទឹក ។
៣. ការទទួលទានផ្លែឈើ ឬបង្អែមភ្លាមៗ
យើងតែងមានទម្លាប់ “លាងមាត់” ដោយផ្លែឈើក្រោយបាយ ប៉ុន្តែផ្លែឈើខ្លះមិនគួរញ៉ាំលាយជាមួយអាហារធ្ងន់ៗឡើយ។
–ផលប៉ះពាល់៖ ផ្លែឈើត្រូវបានរំលាយយ៉ាងលឿន ប៉ុន្តែប្រសិនបើវាត្រូវជាប់គាំងជាមួយអាហារធ្ងន់ៗក្នុងក្រពះ វានឹងបង្កឱ្យមានការផ្អាប់ (Fermentation) បង្កើតជាហ្គាស ធ្វើឱ្យហើមពោះ ភើ និងប៉ះពាល់ដល់ការស្រូបយកសារធាតុចិញ្ចឹមពីអាហារ។
–យកល្អគួរញ៉ាំផ្លែឈើមុនបាយ១ ម៉ោង ឬក្រោយបាយយ៉ាងតិច ១ ម៉ោង ដើម្បីឱ្យក្រពះមានកន្លែងទំនេរសម្រាប់រំលាយវាបានត្រឹមត្រូវ។
ក្រៅពីចំណុចទាំង ៣ នេះ ការពិសារតែខាប់ៗ និងការហាត់ប្រាណធ្ងន់ៗភ្លាមៗ ក៏ជារឿងដែលគួរជៀសវាងផងដែរ។
សុខភាពល្អ ចាប់ផ្ដើមពីការយល់ដឹង និងការកែប្រែទម្លាប់រស់នៅប្រចាំថ្ងៃ។ សូមចែករំលែកចំណេះដឹងនេះទៅកាន់មនុស្សជាទីស្រឡាញ់របស់អ្នក ដើម្បីសុខុមាលភាពទាំងអស់គ្នា ៕