យោងតាមការចុះផ្សាយពីប្រភពបរទេស ទុរេនត្រូវបានគេប្រសិទ្ធនាមថាជា “ស្ដេចផ្លែឈើ” ដោយសាររសជាតិដ៏ឈ្ងុយឆ្ងាញ់ ប៉ុន្តែវាក៏ជាផ្លែឈើដែលសម្បូរទៅដោយជាតិស្ករ ជាតិខ្លាញ់ និងផ្ដល់ថាមពលកម្ដៅខ្ពស់ដល់រាងកាយផងដែរ។
ក្នុងអំឡុងពេលអាកាសធាតុក្ដៅខ្លាំង ការទទួលទានទុរេនដោយខ្វះការប្រុងប្រយ័ត្នអាចបង្កឱ្យមានបញ្ហាសុខភាពធ្ងន់ធ្ងរ រហូតដល់ថ្នាក់គ្រោះថ្នាក់ដល់ជីវិត ប្រសិនបើអ្នកមិនបានដឹងពីចំណុចសំខាន់ៗទាំង ៥ ខាងក្រោមនេះ៖
ជាដំបូង ហាមទទួលទានទុរេនជាមួយគ្រឿងស្រវឹងដាច់ខាត ព្រោះសារធាតុស្ពាន់ធ័រក្នុងទុរេននឹងទៅរារាំងអង់ស៊ីមដែលជួយបំបែកជាតិអាល់កុលក្នុងរាងកាយ នាំឱ្យជាតិពុលកើនឡើងខ្លាំង បណ្ដាលឱ្យក្ដៅខ្លួនខ្លាំង វិលមុខ ណែនទ្រូង ឬគាំងបេះដូង។ ចំណុចទីពីរគឺ ការកម្រិតបរិមាណញ៉ាំ ដោយអ្នកជំនាញណែនាំថាមិនគួរញ៉ាំលើសពី ២ គ្រាប់ក្នុងមួយថ្ងៃឡើយ ព្រោះវាអាចធ្វើឱ្យរាងកាយ “ឡើងកម្ដៅ” ខ្លាំងពេក ជាពិសេសក្នុងរដូវក្ដៅដែលរាងកាយពិបាកភាយកម្ដៅចេញ។
ចំណុចទីបី សម្រាប់ អ្នកមានជំងឺប្រចាំកាយ ដូចជាជំងឺទឹកនោមផ្អែម ជំងឺតម្រងនោម និងលើសឈាម គួរចៀសវាង ឬកាត់បន្ថយឱ្យបានច្រើនបំផុត ព្រោះជាតិស្ករ និងប៉ូតាស្យូមខ្ពស់ក្នុងទុរេនអាចធ្វើឱ្យស្ថានភាពជំងឺកាន់តែអាក្រក់។ ទីបួនគឺ ការផឹកទឹកឱ្យបានច្រើន បន្ទាប់ពីញ៉ាំទុរេនរួច ដើម្បីជួយឱ្យរាងកាយត្រជាក់ និងជួយជម្រុញការរំលាយអាហារបានល្អ។ ចុងក្រោយគឺ ចៀសវាងការញ៉ាំទុរេនជាមួយភេសជ្ជៈដែលមានជាតិកាហ្វេអ៊ីន ដូចជាកាហ្វេ ឬភេសជ្ជៈប៉ូវកម្លាំង ព្រោះវាអាចធ្វើឱ្យបេះដូងលោតញាប់ និងសម្ពាធឈាមឡើងខ្ពស់ខុសធម្មតា។
ការយល់ដឹងពីរបៀបញ៉ាំឱ្យត្រឹមត្រូវ និងការស្គាល់ពីស្ថានភាពសុខភាពខ្លួនឯង គឺជាគន្លឹះដ៏សំខាន់ដែលអនុញ្ញាតឱ្យអ្នករីករាយជាមួយរសជាតិទុរេនដោយក្ដីសុខ និងមានសុវត្ថិភាពខ្ពស់បំផុតក្នុងរដូវក្ដៅនេះ៕