រាងកាយរបស់យើងប្រៀបដូចជា ម៉ាស៊ីនដ៏ឆ្លាតវៃមួយ ដែលវានឹងផ្ដល់សញ្ញាព្រមានភ្លាមៗ នៅពេលមានបញ្ហាខ្វះខាតសារធាតុចិញ្ចឹម ជាពិសេស គឺវីតាមីន ។ ការមើលរំលងសញ្ញាតូចតាច អាចវិវត្តទៅជាបញ្ហាសុខភាពធ្ងន់ធ្ងរនៅថ្ងៃអនាគត ។
ខាងក្រោមនេះ គឺជាសញ្ញាព្រមានសំខាន់ៗចំនួន ៦យ៉ាង ដែលរាងកាយកំពុងប្រាប់ថា អ្នកខ្វះវីតាមីន ៖
១. ឈាមអញ្ចាញធ្មេញ និងដំបៅមាត់ញឹកញាប់
ប្រសិនបើអ្នកឧស្សាហ៍ហូរឈាមតាមអញ្ចាញធ្មេញពេលដុសធ្មេញ ឬមានដំបៅក្នុងមាត់ (បួសក្នុងមាត់) មិនងាយជាសះស្បើយ នេះគឺជាសញ្ញាច្បាស់នៃការខ្វះ វីតាមីនC ។ វីតាមីនC មានតួនាទីជួយដល់ការផ្សះរបួស និងពង្រឹងប្រព័ន្ធការពាររាងកាយ។
ដំណោះស្រាយ៖ បន្ថែមការញ៉ាំផ្លែឈើជូរៗដូចជា ក្រូច ឆ្មារ កាម្ពុជ ឬបន្លែបៃតង។
២. បបូរមាត់ស្ងួតប្រេះ និងដំបៅនៅជ្រុងមាត់
ការប្រេះបបូរមាត់ ឬដំបៅនៅកន្លៀតមាត់ (មាត់ស្អុយ) មិនមែនមកពីការក្ដៅក្នុងតែមួយមុខនោះទេ ប៉ុន្តែវាជាសញ្ញានៃការខ្វះ វីតាមីន B (ជាពិសេស B2, B3, B6 និង B12) និងជាតិដែក។
៣. សក់ជ្រុះខ្លាំង និងក្រចកស្រួយងាយបាក់
សក់ដែលបាត់បង់ភាពរលោង ជ្រុះខុសធម្មតា ឬក្រចកដែលងាយបាក់សំបក គឺជាសញ្ញានៃការខ្វះ វីតាមីន B7 (Biotin)។ Biotin គឺជាសារធាតុដ៏សំខាន់សម្រាប់ជួយឱ្យសក់ និងក្រចករឹងមាំ។
៤. ចុះខ្សោយគំហើញនៅពេលយប់ (ភ្នែកមាន់)
ប្រសិនបើអ្នកមានអារម្មណ៍ថាពិបាកមើលផ្លូវ ឬមើលអ្វីមិនច្បាស់នៅក្នុងទីងងឹត ឬពេលយប់ នេះគឺជាសញ្ញាដំបូងនៃការខ្វះ វីតាមីន A។ ប្រសិនបើទុកយូរ វាអាចបណ្ដាលឱ្យស្ងួតភ្នែក និងប៉ះពាល់ដល់កែវភ្នែកធ្ងន់ធ្ងរ។
៥. ឧស្សាហ៍រមួលក្រពើ និងឈឺចុករោយសាច់ដុំ
ការរមួលក្រពើញឹកញាប់នៅពេលយប់ ឬមានអារម្មណ៍ឈឺសាច់ដុំដោយគ្មានមូលហេតុ អាចជានិមិត្តរូបនៃការខ្វះ វីតាមីន D និងជាតិម៉ាញ៉េស្យូម។ វីតាមីន D ជួយដល់ការស្រូបយកកាល់ស្យូមសម្រាប់ឆ្អឹង និងសាច់ដុំ។
៦. អស់កម្លាំងល្ហិតល្ហៃ និងស្លេកស្លាំង
ទោះបីជាអ្នកសម្រាកបានច្រើន ប៉ុន្តែនៅតែមានអារម្មណ៍ថាអស់កម្លាំង វិលមុខ និងស្បែកមើលទៅស្លេកស្លាំង នេះអាចមកពីការខ្វះ វីតាមីន B12 និងជាតិដែក ដែលនាំឱ្យកើតជំងឺស្លេកស្លាំង (Anemia)។
សុខភាពល្អផ្ដើមចេញពីរបបអាហារដែលមានតុល្យភាព ។ ប្រសិនបើអ្នកសង្កេតឃើញសញ្ញាណាមួយក្នុងចំណោមចំណុចខាងលើ កុំបណ្ដោយឱ្យវាវិវត្តទៅជាជំងឺរ៉ាំរ៉ៃ ។ ការញ៉ាំបន្លែ ផ្លែឈើ និងសាច់ក្នុងបរិមាណសមល្មម គឺជាឱសថដ៏ស័ក្តិសិទ្ធិបំផុតសម្រាប់រាងកាយ ៕