​អាថ៌កំបាំងស្នេហាដែលគ្មានពាក្យលា! ហេតុអ្វីបានជាមនុស្សខ្លះចូលចិត្តបាត់មុខដូចខ្មោចលង បន្ទាប់ពីធ្វើឱ្យយើងស្រឡាញ់?

យោងតាមការចុះផ្សាយពីប្រភពបរទេស ក្នុងយុគសម័យឌីជីថលដែលអ្វីៗកើតឡើងយ៉ាងរហ័ស សូម្បីតែទំនាក់ទំនងស្នេហាក៏អាចប្រែប្រួលត្រឹមមួយប៉ព្រិចភ្នែកដែរ។ “Ghosting” គឺជាពាក្យដែលគេប្រើសម្រាប់ហៅទង្វើរបស់បុគ្គលម្នាក់ដែលសុខៗក៏បាត់ខ្លួនចេញពីជីវិតរបស់យើងដោយគ្មានមូលហេតុ គ្មានការបកស្រាយ និងគ្មានពាក្យលា សូម្បីតែសារមួយឃ្លាក៏គ្មាន។

គេដើរចេញទៅដូចជាខ្មោចបាត់ដាន បន្សល់ទុកត្រឹមតែសញ្ញាសួរ និងការឈឺចាប់ឱ្យយើងរែកពន់តែម្នាក់ឯង ទោះយើងព្យាយាមទាក់ទងទៅយ៉ាងណាក៏គ្មានការឆ្លើយតប។
​
មូលហេតុដែលនាំឱ្យមនុស្សម្នាក់ជ្រើសរើសវិធីដើរចេញបែបនេះ មិនមែនមកពីទូរស័ព្ទគេខូច ឬគ្មានសេវាអ៊ីនធឺណិតនោះទេ ប៉ុន្តែវាអាចមកពីភាពភ័យខ្លាច និងកង្វះការទទួលខុសត្រូវខាងផ្លូវចិត្ត។ ពួកគេខ្លាចទំនាក់ទំនងនោះក្លាយជាការចងកិតខ្លាំងពេក មានអារម្មណ៍ថាដេកមិនចុះសម្រុង ឬសាមញ្ញបំផុតគឺពួកគេមិនចង់ប្រឈមមុខនឹងការពិតក្នុងការនិយាយពាក្យបដិសេធ។ មនុស្សខ្លះយល់ច្រឡំថាការស្ងាត់ស្ងៀមគឺជាការមិនធ្វើឱ្យឈឺចាប់ ប៉ុន្តែការពិតការមិននិយាយអ្វីសោះគឺជាការផ្ដល់របួសផ្លូវចិត្តយ៉ាងធ្ងន់ធ្ងរបំផុត។

ប្រសិនបើអ្នកជួបករណីដែលគេបាត់មុខលើសពី ៧ ថ្ងៃដោយគ្មានហេតុផលសមរម្យ វិធីដែលល្អបំផុតគឺឈប់បន្ទោសខ្លួនឯង ហើយសម្រេចចិត្តដើរចេញដោយភាពជឿជាក់។ ការដែលគេបាត់ទៅដោយមិនលា គឺជាចម្លើយដ៏ច្បាស់លាស់បំផុតមួយដែលប្រាប់ថាគេមិនទាន់មានភាពចាស់ទុំគ្រប់គ្រាន់ក្នុងទំនាក់ទំនងឡើយ។

ចូរចងចាំថាអ្នកសមនឹងទទួលបានដៃគូដែលមានភាពចាស់ទុំ ចេះផ្ដល់តម្លៃឱ្យគ្នាជ្រៅជ្រះ និងហ៊ានប្រឈមមុខនឹងការពិត ជាជាងមនុស្សដែលជ្រើសរើសការបាត់ខ្លួនដើម្បីគេចវេសពីការទទួលខុសត្រូវ​៕