យោងតាមការចុះផ្សាយពីប្រភពបរទេស មនុស្សស្រីភាគច្រើនតែងប្រញាប់ប្រញាល់ធ្វើរឿងមួយចំនួនក្រោយរួមភេទរួច ព្រោះគិតថាវាជួយឱ្យមានអនាម័យ និងមានផាសុកភាព ប៉ុន្តែការពិតទៅ ការអនុវត្តខុសរបៀបអាចជះឥទ្ធិពលអាក្រក់ដល់សុខភាពស្បូន និងបង្កជាជំងឺរោគស្រ្តីផ្សេងៗទៅវិញ។
ទម្លាប់ដំបូងដែលគួរជៀសវាងគឺការប្រើក្រដាសអនាម័យជូតសម្អាតកន្លែងអាថ៌កំបាំងភ្លាមៗ ព្រោះក្រដាសអាចមានផ្ទុកបាក់តេរី ឬជាតិគីមីដែលមើលមិនឃើញ ហើយការជូតបែបនេះអាចបន្សល់កម្ទេចក្រដាសតូចៗបង្កឱ្យមានការឆ្លងមេរោគ នាំឱ្យរលាកមាត់ស្បូន ឬរលាកភ្នាសស្បូន ដូច្នេះវិធីដែលល្អបំផុតគឺការលាងសម្អាតស្រាលៗដោយទឹកក្ដៅឧណ្ហៗ រួចផ្ដិតឱ្យស្ងួតដោយកន្សែងទន់ដែលស្អាត។
ទម្លាប់គ្រោះថ្នាក់ទីពីរគឺការឱ្យរាងកាយប៉ះនឹងខ្យល់ត្រជាក់ភ្លាមៗ ព្រោះក្រោយរួមភេទរួចរាងកាយមានកម្ដៅខ្ពស់ បែកញើស និងចង្វាក់បេះដូងលោតញាប់ ដែលធ្វើឱ្យរន្ធញើស និងស្បូនស្ថិតក្នុងសភាពទន់ខ្សោយងាយរងគ្រោះបំផុត។ ការប្រញាប់បើកបង្អួច បើកកង្ហារ ឬម៉ាស៊ីនត្រជាក់ដាក់ចំខ្លួនភ្លាមៗ អាចធ្វើឱ្យខ្យល់ត្រជាក់ជ្រាបចូលក្នុងរាងកាយ បង្កជាអាការៈស្បូនត្រជាក់ និងធ្វើឱ្យអ្នកងាយធ្លាក់ខ្លួនឈឺបានយ៉ាងងាយ។ ចំណែកឯទម្លាប់ទីបីគឺការងូតទឹកភ្លាមៗក្រោយរួចរាល់ ខណៈពេលដែលរាងកាយនៅហត់នឿយខ្លាំង និងរន្ធញើសកំពុងរីកធំ ដែលអាចធ្វើឱ្យសរសៃឈាមកន្ត្រាក់ខុសធម្មតា បណ្ដាលឱ្យវិលមុខ និងប៉ះពាល់ដល់ដំណើរការស្ដារឡើងវិញនៃភ្នាសស្បូន ដូច្នេះអ្នកគួររង់ចាំយ៉ាងតិចពី ១០ ទៅ ១៥ នាទីឱ្យរាងកាយត្រឡប់មកសភាពធម្មតាវិញសឹមងូតទឹកសម្អាតកាយ។
បន្ថែមពីលើការការពារនេះ អ្នកគួរមានការប្រុងប្រយ័ត្នខ្ពស់ប្រសិនបើមានសញ្ញាព្រមានដូចជាការមករដូវមិនទៀងទាត់ ឈឺពោះផ្នែកខាងក្រោមរ៉ាំរ៉ៃ ឈឺចាប់ខ្លាំងពេលរួមភេទ ធ្លាក់សខុសធម្មតាមានក្លិនប្លែក ឬមានអាការៈនោមទាស់នោមផ្សារជាដើម។
ការយល់ដឹងពីរបៀបថែទាំសុខភាពឱ្យបានត្រឹមត្រូវក្រោយប្រតិបត្តិការស្នេហា មិនត្រឹមតែជួយការពារស្បូនឱ្យមានសុខភាពល្អប៉ុណ្ណោះទេ ប៉ុន្តែថែមទាំងជួយឱ្យអ្នកជៀសផុតពីជំងឺរោគស្រ្តីធ្ងន់ធ្ងរ និងរក្សាបាននូវសម្រស់ស្រស់ថ្លាចេញពីខាងក្នុងផងដែរ៕