យោងតាមការចុះផ្សាយពីប្រភពរទេស ការសម្រកទម្ងន់តាមវិធី Intermittent Fasting (IF) ឬការកំណត់ពេលញ៉ាំអាហារ កំពុងទទួលបានការពេញនិយមយ៉ាងខ្លាំង ជាពិសេសរូបមន្តញ៉ាំ ៨ ម៉ោង និងផ្អាក ១៦ ម៉ោង។
ទោះជាយ៉ាងណាក៏ដោយ ការអនុវត្តឱ្យត្រូវបច្ចេកទេសគឺជាគន្លឹះសំខាន់បំផុត ព្រោះវាមិនត្រឹមតែជួយឱ្យស្រកគីឡូប៉ុណ្ណោះទេ ប៉ុន្តែថែមទាំងជួយឱ្យរាងកាយក្មេងជាងវ័យ និងមានថាមពលខ្លាំងក្លាទៀតផង។ ដើម្បីឱ្យការធ្វើ IF ទទួលបានជោគជ័យ អ្នកគួរផ្ដោតលើការជ្រើសរើសអាហារដែលមានជីវជាតិគ្រប់គ្រាន់ក្នុងអំឡុងពេលញ៉ាំ ដូចជាអាហារសម្បូរប្រូតេអ៊ីន បន្លែ ផ្លែឈើ និងកាបូអ៊ីដ្រាតល្អពីអង្ករសម្រូប ដោយចៀសវាងការញ៉ាំច្រើនជ្រុល ឬញ៉ាំបង្ខំលឿនពេកដែលធ្វើឱ្យប្រព័ន្ធរំលាយអាហារធ្វើការធ្ងន់។
នៅក្នុងអំឡុងពេលផ្អាកញ៉ាំ ១៦ ម៉ោង អ្នកអាចញ៉ាំបានតែទឹកស្អាត កាហ្វេខ្មៅ ឬតែដែលគ្មានជាតិស្ករជានិច្ច ហើយត្រូវចៀសវាងដាច់ខាតនូវសារធាតុផ្អែមជំនួសស្ករ ព្រោះវាអាចទៅរំញោចឱ្យអ្នកកាន់តែឃ្លាន និងចង់ញ៉ាំបង្អែមខ្លាំងជាងមុន។ អត្ថប្រយោជន៍នៃ IF ដែលត្រឹមត្រូវគឺមានឥទ្ធិពលលើសពីការសម្រកទម្ងន់ ព្រោះវាជួយកាត់បន្ថយការរលាកក្នុងរាងកាយ ពន្យារភាពចាស់ និងជួយឱ្យខួរក្បាលចងចាំបានល្អ។ ប៉ុន្តែអ្នកត្រូវប្រយ័ត្នចំពោះទម្លាប់អាក្រក់មួយចំនួន ដូចជាការគេងយឺតដែលធ្វើឱ្យប្រព័ន្ធអ័រម៉ូនរញ៉េរញ៉ៃ ឬការមិនហាត់ប្រាណដែលបណ្ដាលឱ្យបាត់បង់សាច់ដុំ និងងាយកើតមានអាការៈ “យ៉ូយ៉ូ” ឬការឡើងគីឡូខ្លាំងវិញនៅពេលក្រោយ។
ដើម្បីទទួលបានផលល្អបំផុត អ្នកគួររៀបចំពេលវេលាញ៉ាំឱ្យស្របតាម “នាឡិកាជីវិត” ដោយចៀសវាងការញ៉ាំនៅពេលយប់ជ្រៅ និងរួមផ្សំជាមួយការហាត់ប្រាណយ៉ាងហោចណាស់ ៣០ នាទីឱ្យបានទៀងទាត់ពី ៣ ទៅ ៥ ដងក្នុងមួយសប្តាហ៍។ ការទទួលទានអាហារដែលមានជាតិសរសៃខ្ពស់បន្ថែម ក៏នឹងជួយឱ្យអ្នកមានអារម្មណ៍ឆ្អែតបានយូរ និងកាត់បន្ថយការឃ្លានអាហារផ្ដេសផ្ដាស។
ការអនុវត្តតាមវិធីសាស្ត្រត្រឹមត្រូវបែបនេះ មិនត្រឹមតែជួយឱ្យអ្នកទទួលបានរាងស្លីមស្អាតតាមបំណងប៉ុណ្ណោះទេ ប៉ុន្តែថែមទាំងផ្ដល់នូវសុខភាពមាំមួន និងភាពក្មេងខ្ចីដែលចេញពីខាងក្នុងមកក្រៅយ៉ាងពិតប្រាកដ៕