យោងតាមការចុះផ្សាយពីប្រភពបរទេស មហារីកក្រពេញប្រូស្តាតគឺជាសត្រូវស្ងប់ស្ងាត់ដែលបុរសម្នាក់ក្នុងចំណោម ៨ នាក់អាចប្រឈមមុខ។
ទោះជាយ៉ាងណា បើតាមការសិក្សារយៈពេល ១៨ ឆ្នាំដែលចុះផ្សាយក្នុងទស្សនាវដ្តីវេជ្ជសាស្ត្រ European Urology បានបង្ហាញពីតួលេខដ៏គួរឱ្យភ្ញាក់ផ្អើលថា បុរសដែលបញ្ចេញទឹកកាមយ៉ាងហោចណាស់ ២១ ដងក្នុងមួយខែ អាចកាត់បន្ថយហានិភ័យនៃជំងឺមហារីកក្រពេញប្រូស្តាតបានរហូតដល់ ២០% បើធៀបនឹងអ្នកដែលបញ្ចេញត្រឹមតែ ៤ ទៅ ៧ ដង។ អ្នកជំនាញជឿថា សកម្មភាពនេះប្រៀបដូចជាការ “លាងសម្អាត” សារធាតុគីមីដែលមានគ្រោះថ្នាក់ចេញពីក្រពេញប្រូស្តាត ដែលជួយការពាររាងកាយបានយ៉ាងមានប្រសិទ្ធភាព។
ក្រៅពីតួលេខនេះ ការយកចិត្តទុកដាក់លើសញ្ញាព្រមានក៏ជារឿងចាំបាច់បំផុត។ ប្រសិនបើអ្នកសង្កេតឃើញអាការប្លែកៗ ដូចជាមានឈាមលាយក្នុងទឹកនោម ឬទឹកកាម នោមញឹកញាប់ខុសធម្មតានៅពេលយប់ ឬពិបាកក្នុងការចាប់ផ្ដើមបត់ជើងតូច អ្នកគួរតែប្រញាប់ទៅពិគ្រោះជាមួយគ្រូពេទ្យជំនាញជាបន្ទាន់។ សញ្ញាទាំងនេះអាចជាការដាស់តឿនដំបូងដែលមិនគួរមើលរំលងឡើយ ដើម្បីធានាបាននូវការព្យាបាលទាន់ពេលវេលា។
ដើម្បីបង្កើនរបាំងការពារសុខភាពឱ្យកាន់តែរឹងមាំ បុរសគ្រប់រូបគួររួមផ្សំការបញ្ចេញទឹកកាមឱ្យបានទៀងទាត់ ជាមួយនឹងការពិនិត្យសុខភាពក្រពេញប្រូស្តាតប្រចាំឆ្នាំ និងការទទួលទានអាហារដែលមានប្រយោជន៍ ដូចជាប៉េងប៉ោះដែលសម្បូរជាតិ Lycopene ជាដើម។ ការយល់ដឹងពីតុល្យភាពនៃសកម្មភាពរាងកាយ និងការតាមដានសុខភាពយ៉ាងដិតដល់ គឺជាគន្លឹះដ៏សំខាន់ដែលជួយឱ្យអ្នកមានភាពជឿជាក់ និងរស់នៅដោយចៀសផុតពីជំងឺមហារីកដ៏គ្រោះថ្នាក់នេះ៕