យោងតាមការចុះផ្សាយពីប្រភពបរទេស ការផ្ដល់សំណើមដល់រាងកាយបន្ទាប់ពីភ្ញាក់ពីគេងជារឿងល្អ ប៉ុន្តែការជ្រើសរើសភេសជ្ជៈខុសនៅពេលពោះទទេ អាចបង្កផលប៉ះពាល់ធ្ងន់ធ្ងរដល់សុខភាពក្រពះ និងប្រព័ន្ធរាងកាយទាំងមូល។
ទឹកតែដែលចាស់ខ្លាំងគឺជាភេសជ្ជៈទីមួយដែលគួរចៀសវាង ព្រោះជាតិកាហ្វេអ៊ីន និងតានីនខ្ពស់នឹងទៅរំញោចឱ្យក្រពះបញ្ចេញអាស៊ីតហួសកម្រិត បណ្ដាលឱ្យមានអារម្មណ៍មួលពោះ ចង្អោរ និងធ្វើឱ្យអ្នកមានជំងឺក្រពះស្រាប់កាន់តែធ្ងន់ធ្ងរ។ បន្ទាប់មកគឺទឹកឃ្មុំ ទោះបីវាជាឱសថធម្មជាតិ ប៉ុន្តែការផឹកវានៅពេលពោះទទេអាចធ្វើឱ្យកម្រិតជាតិស្ករក្នុងឈាមហក់ឡើងខ្ពស់រហ័សពេក ដែលបណ្ដាលឱ្យរាងកាយមានអារម្មណ៍វិលមុខ ឬល្ហិតល្ហៃនៅពេលក្រោយ។
ចំពោះទឹកផ្លែឈើស្រស់ដែលយើងគិតថាមានវីតាមីនខ្ពស់ ក៏អាចក្លាយជាអាវុធមុខពីរផងដែរ ព្រោះអាស៊ីតក្នុងផ្លែឈើនឹងទៅកកិតស្រទាប់ក្រពះផ្ទាល់ បង្កជាជំងឺច្រាលអាស៊ីត ឬឈឺចុកចាប់នៅចុងដង្ហើមយ៉ាងខ្លាំង។ ចំណែកឯភេសជ្ជៈផ្អែម ឬភេសជ្ជៈកំប៉ុង គឺជាអ្វីដែលត្រូវហាមដាច់ខាត ព្រោះវាប្រៀបដូចជាការផ្ដល់ភាពតក់ស្លុតដល់រាងកាយដោយជាតិស្ករ និងហ្គាស បណ្ដាលឱ្យហើមពោះ និងបង្កើនហានិភ័យនៃជំងឺទឹកនោមផ្អែមក្នុងរយៈពេលវែង។ ជាចុងក្រោយ ទឹកត្រជាក់ខ្លាំងក៏មិនមែនជាជម្រើសល្អដែរ ព្រោះវាធ្វើឱ្យសរសៃឈាមរួមតូចភ្លាមៗ ប៉ះពាល់ដល់ប្រព័ន្ធបញ្ចេញចោល និងអាចបណ្ដាលឱ្យឈឺពោះ ឬរាករូស ជាពិសេសចំពោះមនុស្សចាស់ដែលត្រូវប្រុងប្រយ័ត្នខ្ពស់ចំពោះសម្ពាធឈាម។
ជម្រើសដែលល្អបំផុត និងសាមញ្ញបំផុតសម្រាប់រាងកាយនៅពេលព្រលឹម គឺការក្រេបទឹកឧណ្ហៗ ឬទឹកដែលមានសីតុណ្ហភាពធម្មតាបន្តិចម្ដងៗ។ ការធ្វើបែបនេះនឹងជួយដាស់សរីរាង្គខាងក្នុងឱ្យដំណើរការដោយទន់ភ្លន់ ជំរុញមុខងារពោះវៀន និងរៀបចំរាងកាយឱ្យរួចរាល់សម្រាប់ការទទួលទានអាហារពេលព្រឹកក្នុងរយៈពេល ២០ ទៅ ៣០ នាទីបន្ទាប់ ដើម្បីធានាបាននូវសុខភាពមាំមួនពេញមួយថ្ងៃ៕