យោងតាមការចុះផ្សាយពីប្រភពបរទេស ក្នុងសម័យកាលដ៏មមាញឹក ទូទឹកកករបស់មនុស្សភាគច្រើនសម្បូរទៅដោយអាហារវេចខ្ចប់ស្រាប់ ដូចជាសាច់ក្រក អាហារក្លាសេ និងទឹកជ្រលក់ច្រើនពណ៌ ដែលជាប្រភេទអាហារកែច្នៃកម្រិតខ្ពស់ ។ អាហារទាំងនេះគឺជាតួអង្គឯកដែលធ្វើឱ្យស្បែកស្រអាប់ និងឡើងក្បាលពោះដោយមិនដឹងខ្លួន ប៉ុន្តែអ្នកអាចផ្លាស់ប្តូរទម្លាប់នេះបានយ៉ាងងាយស្រួលដើម្បីសុខភាពមាំមួន និងសម្រស់ស្រស់ថ្លា។
វិធីសាស្ត្រដំបូងគឺការប្រើច្បាប់ “ពាក់កណ្ដាលម្នាក់” សម្រាប់អ្នកដែលមិនទាន់អាចផ្ដាច់អាហារវេចខ្ចប់បានភ្លាមៗ ដោយគ្រាន់តែកាត់បន្ថយបរិមាណមី ឬអាហារកែច្នៃពាក់កណ្ដាល រួចជំនួសមកវិញដោយបន្លែស្រស់ សាច់ស្រស់ ឬស៊ុតស្ងោរដើម្បីទទួលបានជាតិសរសៃ និងវីតាមីនបន្ថែម។ បន្ទាប់មក គួរងាកមកប្រើគ្រឿងទេសពីធម្មជាតិវិញ ដោយកាត់បន្ថយការប្រើទឹកជ្រលក់ដបដែលសម្បូរជាតិស្ករ និងសូដ្យូម រួចជំនួសដោយការប្រើក្រូចឆ្មារ ម្ទេស ខ្ទឹមស និងអំបិលធម្មជាតិ ដើម្បីជួយសម្រាលបន្ទុកថ្លើម និងតម្រងនោម ព្រមទាំងកាត់បន្ថយអាការៈហើមសាច់បានយ៉ាងពូកែ។
ដើម្បីបង្កើនភាពងាយស្រួល និងជៀសវាងភាពខ្ជិលច្រអូស អ្នកគួររៀបចំប្រូតេអ៊ីនស្រស់ទុកក្នុងទូទឹកកកឱ្យរួចរាល់ ដូចជាការលាងហាន់សាច់ទ្រូងមាន់ ឬត្រី រួចចែកជាប្រអប់ៗសម្រាប់មួយពេលៗ ដែលវិធីនេះជួយកាត់បន្ថយការចង់ញ៉ាំសាច់ក្រក ឬប្រហិតបានរហូតដល់ ៨០%។ ចំពោះអាហារសម្រន់ អ្នកអាចប្ដូរពីនំកញ្ចប់ ឬភេសជ្ជៈផ្អែម មកជាផ្លែឈើស្រស់តាមរដូវកាល ឬគ្រាប់ធញ្ញជាតិ ហើយប្រសិនបើអ្នកចង់ញ៉ាំបង្អែម អ្នកអាចយកចេកអំបូងក្លាសេមកកិនធ្វើជាការ៉េមធម្មជាតិដែលជួយរក្សាកម្រិតជាតិស្ករក្នុងឈាមបានល្អ។
ជាចុងក្រោយ ប្រសិនបើចាំបាច់ត្រូវទិញអាហារស្រាប់ គួរទម្លាប់ពិនិត្យមើលស្លាកសញ្ញាផលិតផល ដោយជ្រើសរើសយកម៉ាកណាដែលមានគ្រឿងផ្សំតិចបំផុត និងមិនសូវប្រើសារធាតុគីមី ដើម្បីជួយឱ្យក្រពេញទទួលរសជាតិរបស់អ្នកត្រឡប់មកស៊ាំនឹងរសជាតិពិតនៃធម្មជាតិវិញ៕