យោងតាមការចុះផ្សាយពីប្រភពបរទេស ការហាត់ប្រាណទាំងមិនទាន់ញ៉ាំអ្វីសោះ ឬ Fasted Cardio គឺជាវិធីសាស្ត្រដ៏ពេញនិយមសម្រាប់អ្នកចង់សម្រកខ្លាញ់លឿន ប៉ុន្តែប្រសិនបើអនុវត្តខុសរបៀប វាអាចបង្កផលវិបាកធ្ងន់ធ្ងរដល់រាងកាយវិញ។ នៅពេលពោះទទេ រាងកាយខ្វះថាមពលបម្រុង ដូច្នេះប្រសិនបើអ្នកហាត់ខ្លាំងជ្រុល រាងកាយនឹងទៅរំលាយប្រូតេអ៊ីនក្នុងសាច់ដុំមកប្រើជាថាមពលជំនួសវិញ ដែលធ្វើឱ្យសាច់ដុំរបស់អ្នករួមតូច និងស្បែកយារធ្លាក់មិនតឹងណែន។
ក្រៅពីការបាត់បង់សាច់ដុំ ការហាត់ប្រាណពេលពោះទទេក៏បង្កហានិភ័យនៃសភាពចុះជាតិស្ករក្នុងឈាម ដែលបណ្ដាលឱ្យមានអាការៈញ័រដៃ វិលមុខ ងងឹតមុខ ឬអាចឈានដល់ការសន្លប់បាត់ស្មារតីក្នុងពេលហាត់។ ជាងនេះទៅទៀត វាក៏ជំរុញឱ្យរាងកាយបញ្ចេញអ័រម៉ូនស្រ្តេសកាន់តែច្រើន ដែលជាឧបសគ្គដល់ការបង្កើតសាច់ដុំ និងជាមូលហេតុធ្វើឱ្យរាងកាយឆាប់សន្សំសំចៃខ្លាញ់នៅត្រង់តំបន់ពោះកាន់តែខ្លាំង។ ការបង្ខំរាងកាយខ្លាំងពេកទាំងគ្មានថាមពល ក៏ធ្វើឱ្យប្រសិទ្ធភាពនៃការហាត់ធ្លាក់ចុះ និងអាចនាំឱ្យអ្នកញ៉ាំច្រើនជ្រុលជាបន្តបន្ទាប់ដោយសារភាពស្រេកឃ្លានថាមពលខ្លាំង។
ដើម្បីហាត់ប្រាណឱ្យទទួលបានលទ្ធផលល្អបំផុត អ្នកគួរតែសង្កេតមើលសញ្ញារបស់រាងកាយខ្លួនឯងជាចម្បង។ ប្រសិនបើអ្នកមានអារម្មណ៍ថាអស់កម្លាំង ឬមិនស្រស់ថ្លា អ្នកគួរតែរកអាហារសម្រន់ស្រាលៗដែលងាយរំលាយ ដូចជាចេកអំបូងមួយផ្លែ ញ៉ាំមុនពេលហាត់ប្រហែល ៣០ ទៅ ៦០ នាទី ដើម្បីរក្សាកម្រិតជាតិស្ករក្នុងឈាម និងការពារមាសសាច់ដុំរបស់អ្នក។
ការរក្សាតុល្យភាពរវាងការហាត់ និងការផ្ដល់ថាមពលត្រឹមត្រូវ គឺជាគន្លឹះដ៏សំខាន់សម្រាប់សុខភាពមាំមួន និងរាងកាយស្អាតសមសួនក្នុងរយៈពេលវែង៕