យោងតាមការចុះផ្សាយពីប្រភពបរទេស ការប្រើទុយោបឺតគ្រឿងស្រវឹងមិនមែនធ្វើឱ្យជាតិស្រាកើនកម្រិតដឺក្រេនោះទេ ប៉ុន្តែវាគឺជា “ផ្លូវកាត់” ដែលធ្វើឱ្យអ្នកស្រវឹងជោកជាំលឿនជាងធម្មតាដោយមិនដឹងខ្លួន។
មូលហេតុចម្បងគឺការប្រើទុយោជំរុញឱ្យអ្នកញ៉ាំលឿនខុសពីធម្មតា ដែលធ្វើឱ្យជាតិអាល់កុលហក់ឡើងខ្ពស់ភ្លាមៗក្នុងឈាម រហូតដល់ថ្លើមមិនអាចបំភាយជាតិពុលបានទាន់ពេលវេលា។ លើសពីនេះ ភេសជ្ជៈដែលប្រើទុយោច្រើនតែជាប្រភេទស្រាក្រឡុកដែលមានជាតិស្ករ និងរសជាតិផ្លែឈើ ដែលជួយបិទបាំងភាពល្វីងជូរចត់របស់ស្រា ធ្វើឱ្យអ្នកបឺតយកៗក្នុងបរិមាណដ៏ច្រើនដោយមិនបានប្រុងប្រយ័ត្ន។
ដើម្បីការពារខ្លួនពីការស្រវឹងបាត់បង់ម្ចាស់ការ អ្នកជំនាញណែនាំឱ្យបោះបង់ការប្រើទុយោ រួចងាកមកក្រេបយឺតៗតាមកែវធម្មតាវិញ ដើម្បីឱ្យរាងកាយមានពេលគ្រប់គ្រាន់ក្នុងការរំលាយជាតិស្រា។ ការញ៉ាំទឹកស្អាតឱ្យបានច្រើនទន្ទឹមនឹងការញ៉ាំគ្រឿងស្រវឹង ក៏ជាគន្លឹះដ៏សំខាន់ក្នុងការរក្សាតុល្យភាពជាតិទឹក និងកាត់បន្ថយហានិភ័យនៃការស្រវឹងខ្លាំងជ្រុល។
ការយល់ដឹងពីបច្ចេកទេសញ៉ាំឱ្យបានត្រឹមត្រូវ មិនត្រឹមតែជួយឱ្យអ្នករក្សាកិត្តិយសក្នុងវង់ភេសជ្ជៈប៉ុណ្ណោះទេ ប៉ុន្តែថែមទាំងជួយការពារសុខភាពរាងកាយរបស់អ្នកបានយ៉ាងមានប្រសិទ្ធភាពទៀតផង៕