យោងតាមការចុះផ្សាយពីប្រភពបរទេស ការប្រើប្រាស់ប្រអប់ស្នោសម្រាប់វេចខ្ចប់អាហារបានក្លាយជាទម្លាប់ដ៏ពេញនិយមដោយសារវាមានតម្លៃថោក និងមានភាពងាយស្រួល ប៉ុន្តែវាបង្កនូវហានិភ័យសុខភាពយ៉ាងខ្លាំងប្រសិនបើប្រើប្រាស់មិនបានត្រឹមត្រូវ។
ជាទូទៅ ប្រអប់ស្នោត្រូវបានផលិតឡើងពីសារធាតុ Polystyrene ដែលជាប្រភេទប្លាស្ទិកស្រាលម្យ៉ាង ប៉ុន្តែគ្រោះថ្នាក់អាចកើតមានឡើងនៅពេលដែលវាមានផ្ទុកនូវលោហៈធ្ងន់ៗដូចជា សំណ ឬកាត់ម្យូម ពីដំណើរការផលិតដែលមិនមានស្ដង់ដា។ ជាពិសេស នៅពេលដែលយើងយកប្រអប់ស្នោទៅដាក់អាហារដែលមានកម្ដៅក្ដៅខ្លាំងចាប់ពី ៧០ អង្សាសេឡើងទៅ វានឹងបញ្ចេញសារធាតុពុលម្យ៉ាងឈ្មោះថា Styrene ដែលអាចរលាយចូលទៅក្នុងអាហារ និងបង្កគ្រោះថ្នាក់ដល់រាងកាយនៅពេលទទួលទាន។
ក្រៅពីកម្ដៅខ្លាំង ប្រអប់ស្នោក៏អាចបញ្ចេញជាតិពុលផងដែរនៅពេលប៉ះជាមួយអាហារដែលមានជាតិខ្លាញ់ខ្ពស់ សារធាតុអាស៊ីត (ដូចជាទឹកក្រូចឆ្មារ ឬជ្រក់) និងម្ហូបដែលមានជាតិប្រៃខ្លាំង។
អ្នកជំនាញបានណែនាំយ៉ាងម៉ឺងម៉ាត់ថា មិនគួរប្រើប្រាស់ប្រអប់ស្នោសម្រាប់ដាក់អាហារក្ដៅៗ ទឹកពុះ ឬយកទៅកម្ដៅក្នុងម៉ាស៊ីន Microwave ជាដាច់ខាត។ ដើម្បីធានាសុវត្ថិភាពដល់សុខភាព អ្នកគួរប្រើប្រាស់ប្រអប់ស្នោតែម្ដងគត់សម្រាប់អាហារត្រជាក់ និងគួរផ្លាស់ប្ដូរមកប្រើប្រាស់ប្រអប់អាហារដែលផលិតពីសម្ភារៈមានសុវត្ថិភាពជាងនេះ ដូចជាកែវ ឬជ័រដែលមានស្ដង់ដាត្រឹមត្រូវវិញ ទើបជាជម្រើសដ៏ល្អបំផុតសម្រាប់សុខភាពគ្រួសារ៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕