យោងតាមការចុះផ្សាយពីប្រភពបរទេស ទឹកការ៉ុតមិនត្រឹមតែជាភេសជ្ជៈដ៏ឈ្ងុយឆ្ងាញ់ប៉ុណ្ណោះទេ ប៉ុន្តែវាគឺជា “ឱសថធម្មជាតិ” សម្រាប់សម្រស់ និងសុខភាពរាងកាយទាំងមូល។
វាសម្បូរទៅដោយបេតាការ៉ូទីន វីតាមីន A, C, K និងប៉ូតាស្យូម ការញ៉ាំទឹកការ៉ុតមួយកែវជារៀងរាល់ថ្ងៃ ជួយឱ្យភ្នែកភ្លឺច្បាស់ ការពារការចុះខ្សោយនៃគំហើញ និងពង្រឹងប្រព័ន្ធភាពស៊ាំឱ្យរឹងមាំមិនងាយឈឺថ្កាត់។ អត្ថប្រយោជន៍ដ៏លេចធ្លោបំផុតសម្រាប់សុខភាពចំពោះនារីៗ គឺសមត្ថភាពក្នុងការជួយឱ្យស្បែកភ្លឺថ្លា មានសំណើម និងកាត់បន្ថយស្នាមជ្រួញបានយ៉ាងមានប្រសិទ្ធភាព។
ក្រៅពីជំនួយសម្រស់ ទឹកការ៉ុតក៏ដើរតួនាទីយ៉ាងសំខាន់ក្នុងការបន្សាបជាតិពុលក្នុងថ្លើម ជួយឱ្យប្រព័ន្ធរំលាយអាហារដំណើរការស្រួល និងកាត់បន្ថយជាតិខ្លាញ់អាក្រក់ក្នុងឈាម ដែលជាខែលការពារជំងឺបេះដូង និងសរសៃឈាម។ សារធាតុប្រឆាំងអុកស៊ីតកម្មដ៏ខ្លាំងក្លាក្នុងការ៉ុត ក៏ជួយការពារកោសិការាងកាយពីការរលាក និងកាត់បន្ថយហានិភ័យនៃជំងឺមហារីកមួយចំនួនផងដែរ។ លើសពីនេះ វាក៏ជួយឱ្យសុខភាពមាត់ធ្មេញរឹងមាំ និងកាត់បន្ថយការកើតមានបញ្ហាមហារីកក្នុងមាត់ទៀតផង។
ដើម្បីទទួលបានអត្ថប្រយោជន៍ល្អបំផុត អ្នកគួរញ៉ាំទឹកការ៉ុតស្រស់ដែលមិនបន្ថែមស្ករ ឬទឹកដោះគោច្រើនជ្រុល។ ការបន្ថែមដំណក់ប្រេងអូលីវបន្តិចទៅក្នុងទឹកការ៉ុត នឹងជួយឱ្យរាងកាយស្រូបយកវីតាមីន A បានកាន់តែប្រសើរ។
ទោះជាយ៉ាងណា អ្នកមិនគួរញ៉ាំច្រើនជ្រុលហួសហេតុពេកទេ ព្រោះវាអាចបណ្តាលឱ្យស្បែកប្រែជាពណ៌លឿងជាបណ្ដោះអាសន្ន។ ការញ៉ាំក្នុងបរិមាណសមល្មម និងទៀងទាត់ គឺជាគន្លឹះដ៏ឆ្លាតវៃក្នុងការថែរក្សាសុខភាព និងសម្រស់ឱ្យនៅក្មេងជាងវ័យជានិច្ច៕