យោងតាមការចុះផ្សាយពីប្រភពបរទេស ពាក្យចាស់ពោលថា “ទំពារឱ្យម៉ដ្ត ទើបសុខភាពល្អ” គឺជាការពិតដែលត្រូវបានបញ្ជាក់តាមបែបវិទ្យាសាស្ត្រ។
ការញ៉ាំអាហារលឿនពេកមិនត្រឹមតែធ្វើឱ្យក្រពះធ្វើការធ្ងន់ ដែលបណ្តាលឱ្យហើមពោះ ឈឺពោះ និងមិនរំលាយអាហារប៉ុណ្ណោះទេ ប៉ុន្តែវាក៏ជារនាំងរារាំងខួរក្បាលមិនឱ្យទទួលបានសញ្ញា “ឆ្អែត” ទាន់ពេលវេលាផងដែរ។ កត្តានេះនាំឱ្យអ្នកញ៉ាំលើសកម្រិត បង្កើនហានិភ័យនៃជំងឺធាត់ លើសឈាម លើសជាតិស្ករ និងប៉ះពាល់ដល់សុខភាពបេះដូងថែមទៀត។
ផ្ទុយទៅវិញ ការញ៉ាំយឺតពេកក៏អាចធ្វើឱ្យបាត់បង់រសជាតិអាហារដោយសារអាហារត្រជាក់ ឬប្រែប្រួលសណ្ឋាន ដែលនាំឱ្យការញ៉ាំលែងមានភាពរីករាយ។ អ្នកជំនាញបានណែនាំថា រយៈពេលដ៏ល្អបំផុតសម្រាប់អាហារមួយពេល គឺចន្លោះពី ២០ ទៅ ៣០ នាទី។ ក្នុងអំឡុងពេលនេះ អ្នកគួរទំពារអាហារឱ្យបាន ២០ ទៅ ៣០ ដងក្នុងមួយម៉ាត់ ដើម្បីឱ្យអាហារម៉ដ្តល្អ ងាយស្រួលដល់ការស្រូបយកសារធាតុចិញ្ចឹម និងជួយឱ្យក្រពះដំណើរការបានស្រួល។
ដើម្បីបណ្តុះទម្លាប់ញ៉ាំអាហារឱ្យមានតុល្យភាព អ្នកអាចអនុវត្តតិចនិកងាយៗដូចជា ការដាក់ស្លាបព្រា ឬចង្កឹះចុះក្រោយពេលញ៉ាំមួយម៉ាត់ៗ ដើម្បីរំលឹកខ្លួនឯងឱ្យញ៉ាំយឺតៗ។ អ្វីដែលសំខាន់បំផុតនោះគឺ ការផ្ដោតអារម្មណ៍ទៅលើអាហារ និងចៀសវាងការមើលទូរទស្សន៍ ឬទូរស័ព្ទដៃ ដែលជាកត្តារំខានដល់ការរំលាយអាហារ និងការគ្រប់គ្រងទម្ងន់របស់អ្នក។
ការចំណាយពេលសមស្របលើការញ៉ាំ មិនត្រឹមតែជួយដល់សុខភាពក្រពះពោះវៀនប៉ុណ្ណោះទេ ប៉ុន្តែថែមទាំងជួយឱ្យអ្នកទទួលបានរសជាតិអាហារយ៉ាងពេញលេញ និងមានសុខភាពល្អមាំមួន៕