យោងតាមការចុះផ្សាយពីប្រភពបរទេស កត្តាដែលធ្វើឱ្យយើងឆាប់ចាស់ មិនមែនមានតែពន្លឺព្រះអាទិត្យ ឬហ្សែននោះទេ ប៉ុន្តែរបបអាហារដែលយើងញ៉ាំរាល់ថ្ងៃ ក៏ជាកត្តាជំរុញយ៉ាងខ្លាំងដល់ការបំផ្លាញកោសិកាស្បែកផងដែរ។ អាហារមួយចំនួនមានសមត្ថភាពកាត់បន្ថយការបង្កើតកូឡាជែន និងបង្កឱ្យមានការរលាកក្នុងរាងកាយ ដែលនាំឱ្យស្បែកឆាប់ជ្រីវជ្រួញ និងយារធ្លាក់។
ក្រុមអាហារដែលគួរប្រុងប្រយ័ត្នបំផុតមានដូចជា នំផ្អែម និងនំកញ្ចប់ (នំបុ័ង ដូណាត់ នំខេក) ដែលសម្បូរទៅដោយម្សៅ និងស្ករ ដែលសារធាតុទាំងនេះនឹងទៅបំផ្លាញរចនាសម្ព័ន្ធកូឡាជែនឱ្យឆាប់ខូចគុណភាព។ បន្ទាប់មកគឺ ជាតិស្ករផ្ទាល់ មិនថានៅក្នុងកាហ្វេ តែ ឬភេសជ្ជៈផ្អែមៗនោះទេ ព្រោះជាតិស្ករនឹងទៅភ្ជាប់ជាមួយប្រូតេអ៊ីនក្នុងស្បែក ធ្វើឱ្យស្បែកបាត់បង់ភាពយឺត និងបង្កើតជាស្នាមជ្រីវជ្រួញមុនអាយុ។ ចំពោះ ភេសជ្ជៈដែលមានជាតិហ្គាស និងជាតិផ្អែមខ្លាំង វានឹងធ្វើឱ្យកម្រិតជាតិស្ករក្នុងឈាមហក់ឡើងខ្ពស់ភ្លាមៗ ជំរុញការរលាក និងធ្វើឱ្យប្រព័ន្ធជួសជុលស្បែកដំណើរការយឺត។ ចំណែកឯ គ្រឿងស្រវឹង វិញ វានឹងធ្វើឱ្យរាងកាយខ្វះជាតិទឹក ដែលជាសត្រូវចម្បងនៃការបង្កើតកូឡាជែន និងធ្វើឱ្យស្បែកមើលទៅស្រអាប់មិនស្រស់ថ្លា។
ដើម្បីរក្សាភាពក្មេងជាងវ័យ អ្នកគួរចាប់ផ្ដើមផ្លាស់ប្តូរទម្លាប់បន្តិចម្ដងៗ ដូចជាការកាត់បន្ថយការថែមស្ករក្នុងភេសជ្ជៈ និងជំនួសមកវិញនូវការផឹកទឹកស្អាត ឬតែរុក្ខជាតិគ្មានជាតិស្ករ។ ការជ្រើសរើសញ៉ាំបន្លែ និងផ្លែឈើដែលសម្បូរសារធាតុប្រឆាំងអុកស៊ីតកម្ម (ដូចជា ប៉េងប៉ោះ ផ្លែប៊ឺរី និងបន្លែបៃតង) រួមជាមួយត្រីដែលមានជាតិខ្លាញ់អូមេហ្គា-៣ នឹងជួយឱ្យស្បែករឹងមាំពីខាងក្នុង។ បន្ថែមពីនេះ ការថែរក្សាស្បែកពីខាងក្រៅដោយប្រើគ្រីមការពារកម្ដៅថ្ងៃ វីតាមីន C និងការសម្រាកឱ្យបានគ្រប់គ្រាន់ ក៏ជាផ្នែកមួយដែលមិនអាចខ្វះបាន ដើម្បីទទួលបានស្បែកស្អាតក្មេងជាងវ័យដូចបំណង៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕