យោងតាមការចុះផ្សាយពីប្រភពបរទេស ការដុះក្បាលពោះ និងការកកើតខ្លាញ់រុំសរីរាង្គខាងក្នុងមិនត្រឹមតែជាបញ្ហាសោភ័ណភាពប៉ុណ្ណោះទេ ប៉ុន្តែវាគឺជាសញ្ញាអាសន្ននៃជំងឺមេតាបូលីស សរសៃឈាមបេះដូង និងមហារីកមួយចំនួនដែលយើងមិនគួរមើលរំលង។
មូលហេតុចម្បងដែលធ្វើឱ្យខ្លាញ់អាក្រក់ទាំងនេះកកកុញ គឺផ្ដើមចេញពីរបបអាហារមិនសុខភាពដែលសម្បូរដោយជាតិស្ករ ខ្លាញ់ឆ្អែត និងអាហារកែច្នៃ ជាពិសេសការទម្លាប់ញ៉ាំអាហារពេលយប់ជ្រៅដែលធ្វើឱ្យរាងកាយស្តុកទុកថាមពលលើសទៅជាខ្លាញ់យ៉ាងងាយស្រួល។ ទន្ទឹមនឹងនេះ ការរស់នៅបែបស្ងៀមស្ងាត់ដោយការអង្គុយធ្វើការយូរពេក និងការខ្វះលំហាត់ប្រាណ ក៏ជាកត្តាធ្វើឱ្យប្រព័ន្ធដុតរំលាយអាហារចុះខ្សោយ និងបង្កឱ្យមានការសន្សំកាឡូរីលើសនៅត្រង់តំបន់ពោះ។
ក្រៅពីរបបអាហារ និងសកម្មភាពរាងកាយ កត្តាផ្លូវចិត្ត និងការសម្រាកក៏ដើរតួនាទីយ៉ាងសំខាន់ផងដែរ ដោយការគេងមិនគ្រប់គ្រាន់បង្កឱ្យមានការប្រែប្រួលអ័រម៉ូនឃ្លានខុសប្រក្រតី រីឯភាពតានតឹងរ៉ាំរ៉ៃជំរុញឱ្យរាងកាយផលិតអ័រម៉ូន Cortisol ដែលបង្កើនការស្តុកទុកខ្លាញ់ចំកណ្ដាលរាងកាយ។ បន្ថែមពីនេះ ការពិសាគ្រឿងស្រវឹងលើសកម្រិតដែលផ្ដល់នូវកាឡូរីទទេ នឹងធ្វើឱ្យប្រព័ន្ធមេតាបូលីសដំណើរការយឺត និងបង្កើតឱ្យមាន “ពោះស្រាបៀរ” ដែលប៉ះពាល់យ៉ាងធ្ងន់ធ្ងរដល់ថ្លើម និងពោះវៀន។
ដើម្បីកាត់បន្ថយហានិភ័យទាំងនេះ ការផ្លាស់ប្តូរទម្លាប់មកញ៉ាំអាហារដែលមានជាតិសរសៃខ្ពស់ ការគ្រប់គ្រងស្រ្តេស និងការបង្កើនសកម្មភាពរាងកាយ គឺជាវិធីសាស្ត្រដ៏មានប្រសិទ្ធភាពបំផុតក្នុងការថែរក្សាសុខភាព និងគុណភាពជីវិតឱ្យបានយូរអង្វែង៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕