យោងតាមការចុះផ្សាយពីប្រភពបរទេស សម្រាប់អ្នកដែលមានជំងឺតម្រងនោមរ៉ាំរ៉ៃ អាហារូបត្ថម្ភមិនមែនគ្រាន់តែជាការគាំទ្រនោះទេ ប៉ុន្តែវាគឺជាការព្យាបាលដ៏សំខាន់ដើម្បីពន្យឺតការវិវត្តនៃជំងឺ និងការពារផលវិបាកធ្ងន់ធ្ងរ។
តាមការណែនាំរបស់អ្នកជំនាញ អ្នកជំងឺគួរផ្លាស់ប្តូរទម្លាប់មកផ្ដោតលើការញ៉ាំអាហារដែលបានមកពីរុក្ខជាតិឱ្យបានច្រើន និងគ្រប់គ្រងបរិមាណប្រូតេអ៊ីនឱ្យបានត្រឹមត្រូវ។ ការកាត់បន្ថយការញ៉ាំសាច់ក្រហម និងអាហារកែច្នៃ ហើយជំនួសមកវិញនូវធញ្ញជាតិ និងបន្លែ នឹងជួយកាត់បន្ថយសម្ពាធការងាររបស់តម្រងនោម ព្រោះប្រូតេអ៊ីនពីរុក្ខជាតិបង្កកម្រិតអាស៊ីតទាប និងមានផូស្វ័រដែលរាងកាយស្រូបយកយឺត មិនងាយបង្កគ្រោះថ្នាក់ដូចជាតិផូស្វ័រក្នុងសាច់សត្វ។
ទន្ទឹមនឹងនេះ ការគ្រប់គ្រងបរិមាណប្រូតេអ៊ីនត្រូវធ្វើឡើងតាមដំណាក់កាលនៃជំងឺ ដោយអ្នកជំងឺគួរញ៉ាំក្នុងកម្រិតទាបបំផុតតាមការណែនាំរបស់គ្រូពេទ្យ ដើម្បីពន្យារពេលនៃការលាងឈាម។ បន្ថែមពីនេះ ការគ្រប់គ្រងជាតិរ៉ែក៏ជាចំណុចស្លាប់រស់ផងដែរ ដោយត្រូវកាត់បន្ថយជាតិប្រៃ (អំបិលមិនឱ្យលើសពី ១ ស្លាបព្រាកាហ្វេក្នុងមួយថ្ងៃ) ជៀសវាងជាតិប៉ូតាស្យូមដែលមានក្នុងអាហារកែច្នៃ និងត្រូវប្រុងប្រយ័ត្នបំផុតចំពោះជាតិផូស្វ័រដែលមានក្នុងសារធាតុបន្ថែមអាហារ។
ការសហការជិតស្និទ្ធជាមួយគ្រូពេទ្យឯកទេស និងការចេះពិនិត្យមើលស្លាកសញ្ញាលើផលិតផលអាហារ នឹងជួយឱ្យអ្នកជំងឺរក្សាបាននូវគុណភាពជីវិតល្អ និងទទួលបានលទ្ធផលព្យាបាលជាវិជ្ជមានក្នុងរយៈពេលវែង៕