យោងតាមការចុះផ្សាយពីប្រភពបរទេស ពន្លៃ គឺជារុក្ខជាតិក្នុងគ្រួសារតែមួយជាមួយខ្ញី និងរមៀត ប៉ុន្តែវាមានភាពលេចធ្លោខ្លាំងក្នុងការព្យាបាលការរលាក និងការឈឺចាប់ដែលត្រូវបានប្រើប្រាស់តាំងពីបុរាណកាលមក។ វាជាធាតុផ្សំដ៏សំខាន់បំផុតនៅក្នុង “កញ្ចប់ស្អំរុក្ខជាតិ” ដោយសារក្លិនប្រហើរភាយ និងសមត្ថភាពព្យាបាលដ៏អស្ចារ្យលើសពី ៤០ មុខ ចាប់ពីបញ្ហាសាច់ដុំ រហូតដល់សម្រស់ និងផ្លូវដង្ហើម។
សម្រាប់អ្នកដែលមានបញ្ហាសាច់ដុំ និងសន្លាក់ ពន្លៃជួយកាត់បន្ថយការរលាកសាច់ដុំ ហើម ប៉ោង គ្រេចថ្លោះ បំបាត់ការតឹងសរសៃ និងជួយឱ្យចរន្តឈាមរត់បានស្រួល ជាពិសេសគឺការប្រើជាប្រេងម៉ាស្សា ឬស្អំកាត់បន្ថយការស្ពឹកស្រពន់។ លើសពីនេះ សម្រាប់ស្ត្រីក្រោយសម្រាលកូន ពន្លៃជួយឱ្យស្បូនឆាប់រិញ ជម្រះឈាមអាក្រក់ បំបាត់ការឈឺពោះមករដូវ និងជួយដល់ប្រព័ន្ធរំលាយអាហារ កាត់បន្ថយការហើមពោះ និងឆ្អល់ពោះយ៉ាងពូកែ។
មិនត្រឹមតែបុរាណវិជ្ជាប៉ុណ្ណោះទេ សូម្បីតែផ្នែកសម្រស់ ពន្លៃក៏មានតួនាទីជួយព្យាបាលជំងឺសើស្បែក កមរមាស់ រមាស់ដោយសារមេរោគផ្សិត និងជួយឱ្យស្បែកភ្លឺថ្លា បង្រួមរន្ធញើស និងព្យាបាលមុនរលាកបានយ៉ាងល្អ។ ក្លិនប្រហើររបស់វាថែមទាំងជួយកាត់បន្ថយស្រ្តេស ជួយឱ្យដកដង្ហើមស្រឡះ កាត់បន្ថយអាការៈហឺត និងជួយឱ្យគេងលក់ស្រួល ដែលធ្វើឱ្យពន្លៃក្លាយជា “វីរបុរសរុក្ខជាតិ” ចាំបាច់បំផុតដែលគួរមានដាំនៅក្នុងសួនដំណាំគ្រួសារ៕