យោងតាមការចុះផ្សាយពីប្រភពបរទេស ទោះបីជាអ្នកប្រើទឹកសាប៊ូ ឬទឹកក្រអូបថ្លៃៗយ៉ាងណាក៏ដោយ ប្រសិនបើអ្នកនៅតែជួបបញ្ហាខោអាវមានក្លិនផ្អូមនោះវាអាចបណ្ដាលមកពីកំហុសបច្ចេកទេសតូចតាចដែលអ្នកមើលរំលង។ អ្នកជំនាញមេផ្ទះជប៉ុនដែលមានបទពិសោធជាង ២៥ ឆ្នាំ បានបង្ហាញពីមូលហេតុចម្បង ៣ យ៉ាងដែលធ្វើឱ្យខោអាវបាត់បង់ភាពស្រស់ស្រាយ៖
មូលហេតុដំបូងគឺ ការទុកខោអាវចោលក្នុងម៉ាស៊ីនបោកយូរពេក បន្ទាប់ពីម៉ាស៊ីនបោកឈប់ធ្វើការ។ ម៉ាស៊ីនបោកខោអាវគឺជាកន្លែងដែលមានសំណើមខ្ពស់ ដែលជាបរិយាកាសអំណោយផលបំផុតសម្រាប់បាក់តេរីលូតលាស់។ ប្រសិនបើអ្នកទុកខោអាវសើមចោលលើសពី ១ ម៉ោង បាក់តេរីនឹងចាប់ផ្តើមបំបែកខ្លួន ហើយបើទុកដល់ ៥ ម៉ោង វានឹងបង្កើតក្លិនផ្អូមដែលពិបាករសាយទៅវិញ។ វិធីដោះស្រាយគឺត្រូវយកខោអាវចេញមកហាលភ្លាម ឬកំណត់ម៉ោងឱ្យម៉ាស៊ីនបោកឱ្យត្រូវនឹងពេលដែលអ្នកត្រលប់មកផ្ទះវិញ។
មូលហេតុទីពីរដែលមនុស្សជាច្រើនយល់ច្រឡំគឺ ការដាក់ទឹកសាប៊ូ ឬទឹកក្រអូបច្រើនជ្រុល។ ការដាក់ច្រើនមិនមែនមានន័យថាស្អាត ឬក្រអូបជាងមុននោះទេ ប៉ុន្តែវាធ្វើឱ្យសាប៊ូលាងជម្រះមិនអស់ និងបន្សល់ទុកកម្ទេចកម្ទីជាប់សរសៃក្រណាត់។ សារធាតុដែលនៅសេសសល់ទាំងនេះគឺជាចំណីរបស់បាក់តេរី ដែលបង្កឱ្យមានក្លិនអាក្រក់នៅពេលស្ងួត។ អ្នកគួរប្រើប្រាស់ក្នុងបរិមាណដែលបានកំណត់លើសំបកវេចខ្ចប់ និងឧស្សាហ៍លាងសម្អាតធុងបោកខោអាវឱ្យបានទៀងទាត់។
មូលហេតុចុងក្រោយគឺ ការហាលខោអាវក្នុងកន្លែងដែលគ្មានខ្យល់ចេញចូល ជាពិសេសការហាលក្នុងផ្ទះពេលមេឃភ្លៀង។ ការហាលខោអាវកៀកជញ្ជាំង ក្បែរវាំងនន ឬកន្លែងអាប់អួរ ធ្វើឱ្យខោអាវស្ងួតមិនស្មើគ្នា និងបង្កកកម្ដៅសំណើម។ ដើម្បីឱ្យខោអាវស្ងួតលឿន និងមានក្លិនក្រអូប អ្នកគួរប្រើកង្ហារជួយបក់ ឬហាលនៅកន្លែងដែលមានខ្យល់អាកាសបរិសុទ្ធចេញចូលបានល្អ៕