យោងតាមការចុះផ្សាយពីប្រភពបរទេស ទឹកដោះគោគឺជាប្រភពអាហាររូបត្ថម្ភដ៏មានតម្លៃដែលផ្តល់នូវជាតិកាល់ស្យូម ប្រូតេអ៊ីន និងវីតាមីនសំខាន់ៗសម្រាប់ទ្រទ្រង់រាងកាយក្នុងគ្រប់ដំណាក់កាលនៃជីវិត។
ចាប់ផ្ដើមពីវ័យទារក ទឹកដោះម្ដាយគឺជាអាហារដ៏ល្អបំផុតដែលផ្ដល់នូវប្រព័ន្ធការពាររាងកាយ និងជួយដល់ការលូតលាស់ខួរក្បាលបានយ៉ាងល្អបំផុតក្នុងកំលុងពេល ៦ ខែដំបូងរហូតដល់អាយុ ២ ឆ្នាំ។ នៅពេលកុមារឈានចូលវ័យសិក្សា ការញ៉ាំទឹកដោះគោស្រស់រសជាតិដើមយ៉ាងតិច ២ កែវក្នុងមួយថ្ងៃ គឺជាគន្លឹះសំខាន់ក្នុងការបង្កើនកម្ពស់ បង្រឹងឆ្អឹង និងធ្មេញឱ្យរឹងមាំ ព្រមទាំងជួយកាត់បន្ថយហានិភ័យនៃជំងឺធាត់ និងពុកធ្មេញដោយសារការកាត់បន្ថយការញ៉ាំផ្អែម។ ចំពោះក្មេងដែលមានអាការៈអាឡែស៊ីជាមួយទឹកដោះគោគោ ឪពុកម្ដាយអាចជ្រើសរើសទឹកដោះគោសណ្ដែក ឬប្រភេទទឹកដោះគោដែលចម្រាញ់ចេញពីអាស៊ីតអាមីណូជំនួសវិញបាន។
សម្រាប់មនុស្សពេញវ័យ និងស្ត្រីមានផ្ទៃពោះ ទឹកដោះគោជួយបំប៉នឆ្អឹងមាតា និងកសាងគ្រោងឆ្អឹងរបស់ទារកក្នុងផ្ទៃឱ្យមានសុខភាពល្អ ប៉ុន្តែសម្រាប់អ្នកដែលមានបញ្ហាជាតិខ្លាញ់ក្នុងឈាមខ្ពស់ គួរជ្រើសរើសប្រភេទទឹកដោះគោខ្វះជាតិខ្លាញ់វិញ។ ចំពោះមនុស្សវ័យជរា ការញ៉ាំទឹកដោះគោមួយកែវក្នុងមួយថ្ងៃជួយជួសជុលផ្នែកដែលសឹកកម្រើកនៃរាងកាយ បង្ការជំងឺពុកឆ្អឹង និងជួយឱ្យប្រព័ន្ធប្រសាទឆ្លើយតបបានរហ័ស។
ក្រៅពីការបំប៉នឆ្អឹង ទឹកដោះគោនៅមានអត្ថប្រយោជន៍ជាច្រើនទៀតដូចជា ជួយឱ្យឈាមកកបានល្អពេលមានរបួស កាត់បន្ថយសម្ពាធឈាម និងកាត់បន្ថយហានិភ័យនៃជំងឺមហារីកពោះវៀនធំផងដែរ។ ដើម្បីទទួលបានលទ្ធផលល្អបំផុតក្នុងការលូតលាស់កម្ពស់សម្រាប់កុមារ ការញ៉ាំទឹកដោះគោគួរតែធ្វើឡើងទន្ទឹមនឹងការហាត់ប្រាណដូចជា ហែលទឹក ឬលេងបាល់បោះជាដើម៕