យោងតាមការចុះផ្សាយពីប្រភពបរទេស វីតាមីន C គឺជាខែលការពាររាងកាយដ៏សំខាន់ដែលជួយពង្រឹងប្រព័ន្ធស៊ាំ ជំរុញការផលិតកូឡាជែនសម្រាប់ស្បែក និងជួយឱ្យរបួសឆាប់ជាសះស្បើយ។ ជាមធ្យម មនុស្សពេញវ័យត្រូវការវីតាមីន C ពី ៧៥ ទៅ ៩០ មិល្លីក្រាមក្នុងមួយថ្ងៃ ដើម្បីរក្សាសុខភាពឱ្យមាំមួន និងការពារការបំផ្លាញកោសិកាពីមជ្ឈដ្ឋានខាងក្រៅ។
ក្នុងចំណោមផ្លែឈើជាច្រើន ផ្លែត្របែកឈរនៅលំដាប់ថ្នាក់លេខ ១ ដោយផ្ដល់វីតាមីន C រហូតដល់ ២២៨ មិល្លីក្រាមក្នុងទម្ងន់ ១០០ ក្រាម ដែលខ្ពស់ជាងគេបំផុត បន្ទាប់មកគឺម្ទេសប្លោកដែលជួយដល់សុខភាពភ្នែក និងផ្លែគីវីដែលការពារជំងឺបេះដូង។ ចំណែកឯផ្លែល្ហុង និងផ្លែស្ត្រប៊ឺរីវិញ ក៏ជាប្រភពវីតាមីន C ដ៏ប្រសើរដែលជួយសម្រួលដល់ការរំលាយអាហារ កាត់បន្ថយការរលាកសន្លាក់ និងការពារសុខភាពខួរក្បាល។
ការបញ្ចូលផ្លែឈើទាំងនេះទៅក្នុងរបបអាហារប្រចាំថ្ងៃ គឺជាវិធីសាស្ត្រដ៏ឆ្លាតវៃក្នុងការថែរក្សារាងកាយឱ្យចៀសផុតពីជំងឺដង្កាត់ និងជួយឱ្យស្បែកមានសុខភាពល្អពីខាងក្នុង៕