យោងតាមការចុះផ្សាយពីប្រភពបរទេស កាលបរិច្ឆេទផុតកំណត់ (Expiry Date/Best Before) នៅលើដបគ្រឿងទេស មិនមែនមានន័យថាអាហារនោះនឹងខូចភ្លាមៗនៅថ្ងៃបន្ទាប់នោះទេ។
វាគ្រាន់តែជាការបញ្ជាក់ពី “គុណភាពល្អបំផុត” ដែលរសជាតិ ក្លិន និងពណ៌នៅរក្សាបានស្តង់ដា។ ចំពោះគ្រឿងផ្សំដែលមានជាតិប្រៃខ្ពស់ដូចជា ទឹកត្រី ឬទឹកស៊ីអ៊ីវ ប្រសិនបើលើសកាលបរិច្ឆេទបន្តិចបន្តួច តែគ្មានក្លិនចម្លែក ឬដុះផ្សិត គឺអ្នកនៅតែអាចប្រើប្រាស់បាន ប៉ុន្តែរសជាតិអាចនឹងប្រែប្រួលខ្លះ។
ទោះជាយ៉ាងណា អ្នកត្រូវ បោះចោលភ្លាមៗ ប្រសិនបើគ្រឿងផ្សំមានសញ្ញាគ្រោះថ្នាក់ដូចជា៖ មានដុះផ្សិត ឬចំណុចខ្មៅៗ, មានក្លិនជូរផ្អូម ឬក្លិនស្អុយខុសធម្មតា, ទឹកជ្រលក់បែកស្រទាប់គ្នាខ្លាំងដែលក្រឡុកមិនចូលវិញ ឬរបស់ដែលផុតកំណត់រាប់ឆ្នាំហើយ។
ដើម្បីគ្រប់គ្រងផ្ទះបាយឱ្យមានប្រសិទ្ធភាព អ្នកគួរអនុវត្តតិកនិក “ទិញក្រោយដាក់ក្រោយ ទិញមុនដាក់មុខ” រក្សាទុកគ្រឿងទេសឱ្យឆ្ងាយពីកម្តៅថ្ងៃ ឬសំណើម និងគួរកត់កាលបរិច្ឆេទដែលអ្នកបានបើកដបប្រើដំបូង ដើម្បីធានាបានទាំងរសជាតិឆ្ងាញ់ និងសុវត្ថិភាពខ្ពស់សម្រាប់ក្រុមគ្រួសារ៕