យោងតាមការចុះផ្សាយពីប្រភពបរទេស ចេកទុំជាធម្មតាឆាប់ប្រែពណ៌ខ្មៅ និងទន់ជ្រាយខ្លាំងក្នុងរយៈពេលខ្លី ប៉ុន្តែអ្នកអាចពន្យារភាពស្រស់បំព្រងរបស់វាបានរហូតដល់រាប់សប្តាហ៍ ដោយគ្រាន់តែប្រើប្រាស់ “ទឹកអំបិល” ជាជំនួយ។ វិធីសាស្ត្រនេះមានប្រសិទ្ធភាពខ្ពស់ក្នុងការកម្ចាត់បាក់តេរី និងមេរោគផ្សិតដែលតោងជាប់នឹងសំបកចេក ព្រមទាំងជួយពន្យារសកម្មភាពរបស់អង់ស៊ីម និងការភាយចេញនៃឧស្ម័ន Ethylene ដែលជាភ្នាក់ងារធ្វើឱ្យផ្លែឈើឆាប់ទុំជ្រុល។
ដើម្បីអនុវត្តវិធីនេះ អ្នកគ្រាន់តែលាយអំបិល ១ ស្លាបព្រាបាយជាមួយទឹកស្អាត រួចយកចេកទាំងស្និតទៅលាងសម្អាតឱ្យបានសព្វល្អ ទាំងនៅលើសំបក និងជាពិសេសគឺនៅត្រង់ទងចេក។ បន្ទាប់ពីលាងរួច ចំណុចដែលសំខាន់បំផុតគឺត្រូវប្រើកន្សែងជូតវាឱ្យស្ងួតល្អជាដាច់ខាត ព្រោះសំណើមដែលនៅសេសសល់អាចបណ្ដាលឱ្យដុះផ្សិតបានយ៉ាងងាយ។ ក្រោយពេលស្ងួតល្អហើយ អ្នកគួររក្សាទុកចេកនៅកន្លែងដែលមានខ្យល់ចេញចូលល្អ និងមិនត្រូវកម្ដៅថ្ងៃផ្ទាល់ឡើយ។
ក្រៅពីការលាងទឹកអំបិល អ្នកក៏អាចប្រើតិកនិកបន្ថែមដើម្បីឱ្យចេកកាន់តែស្រស់បានយូរ ដូចជាការយកផ្លាស្ទិក ឬក្រដាសអាលុយមីញ៉ូមមករុំនៅត្រង់ទងចេកឱ្យជិត ដើម្បីទប់ស្កាត់ការរាលដាលនៃឧស្ម័នទុំទៅកាន់ផ្លែចេកដទៃទៀត។ ការព្យួរចេកទុកក៏ជាជម្រើសដ៏ល្អ ព្រោះវាជួយឱ្យខ្យល់ចរន្តជុំវិញផ្លែបានល្អ និងការពារកុំឱ្យផ្លែចេកផ្នែកខាងក្រោមរងសម្ពាធទម្ងន់រហូតដល់ជាំសាច់។ ជាចុងក្រោយ អ្នកគួរទុកចេកឱ្យឆ្ងាយពីផ្លែប៉ោម ផ្លែបឺរ ឬប៉េងប៉ោះ ព្រោះផ្លែឈើទាំងនេះភាយឧស្ម័នទុំខ្លាំង ដែលអាចធ្វើឱ្យចេករបស់អ្នកឆាប់រលួយជាងធម្មតា៕