យោងតាមការចុះផ្សាយពីប្រភពបរទេស ការញៀនតែគុជនៅម៉ោង ២:៣០ រសៀល មិនមែនជារឿងចៃដន្យទេ ប៉ុន្តែវាបណ្ដាលមកពីរបបអាហារថ្ងៃត្រង់ដែលមានជាតិម្សៅខ្ពស់ពេក (បាយស ឬគុយទាវ) ដែលធ្វើឱ្យជាតិស្ករក្នុងឈាមធ្លាក់ចុះយ៉ាងគំហុកនៅពេលរសៀល។ នៅពេលនោះ ខួរក្បាលនឹងបញ្ជាឱ្យអ្នកស្វែងរកជាតិស្ករដើម្បីបង្កើតសារធាតុរីករាយ បំបាត់ភាពល្វើយ និងស្ត្រេសពីការងារ។
ទោះជាយ៉ាងណា ការបំពេញតម្រូវការនេះដោយតែគុជ គឺជាការដាក់បន្ទុកធ្ងន់ដល់រាងកាយ។ តែគុជមួយកែវអាចមានថាមពលរហូតដល់ ១,០០០កាល់ឡូរី (ស្មើនឹងបាយ ២ ពេល) ប៉ុន្តែគ្មានសារធាតុចិញ្ចឹម ក្រៅពីស្ករចម្រាញ់ និងខ្លាញ់អាក្រក់។ ការសិក្សារបស់ Harvard បង្ហាញថា ការញ៉ាំភេសជ្ជៈផ្អែមរាល់ថ្ងៃ បង្កើនហានិភ័យស្លាប់មុនវ័យដល់ទៅ ២១% នាំឱ្យកើតជំងឺទឹកនោមផ្អែម ខ្លាញ់រុំថ្លើម លើសឈាម បំផ្លាញស្បែកឱ្យស្រអាប់ និងបង្កឱ្យធាត់ដុះក្បាលពោះយ៉ាងលឿន។
ដើម្បីកាត់ផ្ដាច់ទម្លាប់គ្រោះថ្នាក់នេះ អ្នកគួរផ្លាស់ប្តូររបបអាហារថ្ងៃត្រង់មកញ៉ាំជាតិម្សៅស្រូបយឺត (បាយអង្ករសំរូប ឬដំឡូងជ្វា) រួមជាមួយបន្លែ និងប្រូតេអ៊ីន ដើម្បីរក្សាជាតិស្ករឱ្យមានស្ថេរភាព។ ប្រសិនបើមានអារម្មណ៍ឃ្លាននៅពេលរសៀល ជម្រើសដ៏ល្អបំផុតគឺការផឹកតែរុក្ខជាតិគ្មានស្ករ ឬញ៉ាំអាហារសម្រន់សុខភាពដូចជា ស៊ុតស្ងោរ យ៉ាអួធម្មជាតិ ឬផ្លែឈើស្ករទាប ជំនួសឱ្យការប្រើប្រាស់ជាតិស្ករដែលផ្ដល់ផលវិបាកយូរអង្វែងដល់ជីវិត៕