យោងតាមការចុះផ្សាយពីប្រភពបរទេស ការជ្រុះសក់មិនមែនមកពីហ្សែនតែមួយមុខនោះទេ ប៉ុន្តែវាអាចបណ្តាលមកពីរបៀបរស់នៅប្រចាំថ្ងៃដែលយើងមិនបានចាប់អារម្មណ៍។ ប្រសិនបើអ្នកចង់រក្សាសក់ឱ្យក្រាស់ និងមានសុខភាពល្អ ចូរជៀសវាងឥរិយាបថគ្រោះថ្នាក់ទាំងនេះ៖
ភាពតានតឹងគឺជាសត្រូវលំដាប់មួយ ដែលជំរុញឱ្យរាងកាយបញ្ចេញអ័រម៉ូន Cortisol បណ្តាលឱ្យសក់ជ្រុះខុសធម្មតា។ បន្ថែមពីនេះ ការងូតទឹកក្ដៅឧណ្ហៗញឹកញាប់ពេក ឬការទុកឱ្យស្បែកក្បាលប៉ះកម្ដៅខ្លាំងពីពន្លឺព្រះអាទិត្យ និងឧបករណ៍ធ្វើម៉ូតសក់ នឹងធ្វើឱ្យស្បែកក្បាលស្ងួត ស្រទាប់ការពារសក់ស្តើង និងងាយដាច់ជ្រុះ។ ចំពោះអ្នកដែលចូលចិត្តចងសក់តឹងពេក ក៏ត្រូវប្រយ័ត្នដែរ ព្រោះវាបង្កើតសម្ពាធខ្លាំងលើឫសសក់ដែលនាំឱ្យខូចខាតយូរអង្វែង។
ក្រៅពីកត្តាខាងក្រៅ ការជ្រើសរើសប្រើសិតសក់ដែកដែលបង្កើតការកកិតខ្លាំង ឬផលិតផលថែរក្សាសក់មិនសមស្រប ក៏ជាមូលហេតុធ្វើឱ្យសក់បែកចុង និងជ្រុះដែរ។ ការកក់សក់ក៏ត្រូវមានតុល្យភាព មិនគួរកក់តិចពេក (ធ្វើឱ្យស្បែកក្បាលឡើងប្រេងខ្លាំង) ឬញឹកញាប់ពេក (ធ្វើឱ្យបាត់បង់ជាតិប្រេងធម្មជាតិ) នោះទេ។ ចំណុចចុងក្រោយដែលសំខាន់បំផុតគឺ របបអាហារ និងផលប៉ះពាល់ពីថ្នាំមួយចំនួន។ ការខ្វះជាតិដែក ស័ង្កសី និងប្រូតេអ៊ីន នឹងធ្វើឱ្យសក់ខ្សោយ ដូច្នេះការញ៉ាំអាហារដែលមានតុល្យភាពគឺជាគន្លឹះដ៏សំខាន់បំផុតក្នុងការថែរក្សាសក់ឱ្យនៅស្រស់ស្អាត៕