យោងតាមការចុះផ្សាយពីប្រភពបរទេស ការជ្រើសរើសសាប៊ូកក់សក់ខុស ឬមានផ្ទុកសារធាតុគីមីខ្លាំង អាចបង្កជាផលប៉ះពាល់ធ្ងន់ធ្ងរដល់ស្បែកក្បាល និងសម្រស់សក់របស់អ្នក។
សញ្ញាដំបូងដែលអ្នកគួរកត់សម្គាល់ គឺអារម្មណ៍រមាស់ខ្លាំង ឡើងក្រហម ឬក្រហាយដូចរលាកលើស្បែកក្បាលភ្លាមៗបន្ទាប់ពីប្រើប្រាស់ ទោះបីជាគ្មានរបួសក៏ដោយ។ ក្រៅពីស្បែកក្បាល ប្រតិកម្មនេះក៏អាចបង្កជាកន្ទួលរមាស់នៅតាមតំបន់ដែលប៉ះពាល់ផ្ទាល់ជាមួយសាប៊ូ ដូចជាកញ្ចឹងក ខ្នង និងស្មា ដោយសារសារធាតុសម្អាតខ្លាំងដូចជា SLS ឬ Parabens បំផ្លាញសំណើមធម្មជាតិរបស់ស្បែក។
សញ្ញាមួយទៀតដែលមនុស្សភាគច្រើនតែងយល់ច្រឡំថាជាបញ្ហាស្បែកធម្មតា គឺការកើតមុននៅតាមបណ្ដោយថ្ងាស ខ្សែសក់ និងថ្គាម។ បញ្ហានេះបណ្ដាលមកពីសារធាតុស៊ីលីកូនក្នុងសាប៊ូទៅបិទជិតរន្ធញើស បង្កឱ្យមានការស្ទះ និងវិវត្តទៅជាមុនខ្មៅ ឬមុនក្បាលស។ ជាមួយគ្នានេះ ប្រសិនបើអ្នកស្រាប់តែមានអង្គែស្បែកក្បាលរបកសៗខុសធម្មតា ឬសក់ចាប់ផ្ដើមជ្រុះខ្លាំងបន្ទាប់ពីប្តូរសាប៊ូថ្មី នោះវាជាសញ្ញាព្រមានថាឫសសក់របស់អ្នកកំពុងរងការខូចខាតពីកាកសំណល់គីមីដែលនៅសេសសល់។
ដើម្បីស្រោចស្រង់សុខភាពស្បែកក្បាលឡើងវិញ អ្នកត្រូវឈប់ប្រើសាប៊ូនោះជាដាច់ខាត ហើយលាងសម្អាតសក់ជាមួយទឹកស្អាតឱ្យបានច្រើន។ ក្នុងអំឡុងពេលនេះ គួរជៀសវាងការប្រើកម្ដៅលើសក់ និងងាកមកជ្រើសរើសសាប៊ូកក់សក់ដែលមានកម្រិត pH សមស្រប ឬផលិតផលដែលចម្រាញ់ចេញពីធម្មជាតិ។ ការទទួលទានទឹកឱ្យបានច្រើន និងរបបអាហារសម្បូរប្រូតេអ៊ីន ឬអូមេហ្គា ៣ ក៏ជាផ្នែកមួយជួយជួសជុលកោសិកាស្បែកក្បាលឱ្យរឹងមាំឡើងវិញផងដែរ។
ប្រសិនបើរោគសញ្ញាមិនធូរស្រាល អ្នកគួរតែទៅពិគ្រោះជាមួយគ្រូពេទ្យឯកទេសស្បែកដើម្បីទទួលបានការព្យាបាលត្រឹមត្រូវ៕