យោងតាមការចុះផ្សាយពីប្រភពបរទេស ម្ចាស់ឆ្មាភាគច្រើនប្រាកដជាធ្លាប់ជួបបញ្ហា “មិត្តសម្លាញ់មានរោម” ព្យាយាមរារាំងមិនឱ្យចេញពីផ្ទះ តាមរយៈការអង្គុយយាមមាត់ទ្វារ រមៀលខ្លួនបញ្ចេញមន្តស្នេហ៍ ឬជួនកាលឈានដល់ការខាំជើងដើម្បីបង្អង់ដំណើរម្ចាស់។
តាមការពន្យល់របស់ពេទ្យសត្វ ក្រៅពីការចង់នៅក្បែរម្ចាស់ ឆ្មាមានសភាវគតិចង់គ្រប់គ្រងទឹកដីរបស់វា។ នៅពេលវាឃើញអ្នករៀបចំខ្លួនធ្វើអ្វីមួយដែលវាមិនពេញចិត្ត វានឹងចូលមកជ្រៀតជ្រែកភ្លាមៗ។ លើសពីនេះ ប្រសិនបើអ្នកធ្លាប់មានប្រតិកម្មតបតខ្លាំង ឬលេងជាមួយវាពេលវារារាំងទ្វារ វានឹងយល់ថាការធ្វើបែបនេះគឺជាល្បែងកម្សាន្តដែលវាកាន់តែចង់ធ្វើម្ដងហើយម្ដងទៀត។
ដើម្បីដោះស្រាយស្ថានភាពនេះ អ្នកគួររក្សាភាពស្ងប់ស្ងាត់ដោយមិនចាំបាច់មានប្រតិកម្មខ្លាំងជាមួយវាឡើយ ព្រោះបើអ្នកកាន់តែរំភើប វាកាន់តែចង់លេង។ អ្នកក៏អាចសាកល្បងផ្លាស់ប្តូរលំដាប់លំដោយនៃការរៀបចំខ្លួនមុនចេញពីផ្ទះ ដើម្បីកុំឱ្យឆ្មាទាយដឹងមុន ហើយមកអង្គុយចាំស្ទាក់ផ្លូវបាន។ អ្វីដែលសំខាន់បំផុត គឺត្រូវផ្តល់ពេលវេលាលេងជាមួយវាឱ្យបានគ្រប់គ្រាន់នៅពេលផ្សេងទៀត ដើម្បីបំពេញនូវតម្រូវការផ្លូវចិត្ត និងជួយឱ្យអ្នកអាចចាកចេញពីផ្ទះបានយ៉ាងរលូន៕