លាងសាច់មាន់​៖ កំហុសឆ្គងដែលនាំមេរោគចូលក្នុងផ្ទះបាយ

យោងតាមការផ្សាយពីប្រភពបរទេស នៅក្នុងផ្ទះបាយរបស់គ្រួសារជាច្រើន ការលាងសាច់មាន់ឆៅក្រោមទឹកដែលកំពុងហូរ ត្រូវបានចាត់ទុកថាជាជំហានអនាម័យមិនអាចខ្វះបានដើម្បីជម្រះរំអិល និងក្លិនឆ្អាប។

ទោះជាយ៉ាងណាក៏ដោយ អ្នកជំនាញសុវត្ថិភាពចំណីអាហារមកពីសហរដ្ឋអាម៉េរិក (USDA) រហូតដល់អ្នកជំនាញនៅវៀតណាម និងហុងកុង បានព្រមានជាឯកច្ឆន្ទឱ្យបញ្ឈប់ទម្លាប់នេះជាបន្ទាន់ ព្រោះវាផ្តល់ត្រឹមតែ “អារម្មណ៍ស្អាត” ខាងផ្លូវចិត្ត ប៉ុន្តែបង្កគ្រោះថ្នាក់ជាក់ស្តែង។ ការលាងសាច់មាន់ក្រោមរំហូរទឹកខ្លាំង មិនអាចសម្លាប់បាក់តេរីកាចសាហាវដូចជា Salmonella ឬ Campylobacter បានឡើយ ផ្ទុយទៅវិញ វានឹងធ្វើឱ្យដំណក់ទឹកដែលមានផ្ទុកមេរោគខ្ទាតទៅលើអាងលាងចាន ជ្រុញ កាំបិត និងគ្រឿងបរិក្ខារជុំវិញ បង្កើតជាការចម្លងមេរោគឆ្លងដែលយើងមិនអាចមើលឃើញដោយភ្នែកទទេបាន។

ដើម្បីធានាសុវត្ថិភាព និងអនាម័យពិតប្រាកដ អ្នកជំនាញបានណែនាំនូវជម្រើសថ្មីដែលល្អជាងមុន ដោយបន្ទាប់ពីទិញសាច់មាន់មក លោកអ្នកគ្រាន់តែប្រើក្រដាសអនាម័យសម្រាប់ផ្ទះបាយ​ផ្ដិតជូតលើសាច់ឱ្យស្ងួត រួចយកទៅប្រឡាក់គ្រឿងចម្អិនភ្លាមៗ ឬរក្សាទុកក្នុងទូទឹកកកឱ្យបានត្រឹមត្រូវ។ អ្វីដែលសំខាន់បំផុតដែលត្រូវចងចាំគឺមានតែ “កម្ដៅនៃការចម្អិនឱ្យឆ្អិនល្អ” ប៉ុណ្ណោះ ដែលជាភ្នាក់ងារដ៏មានប្រសិទ្ធភាពបំផុតក្នុងការសម្លាប់បាក់តេរី មិនមែនទឹកលាងសម្អាតនោះទេ។

បន្ថែមពីនេះ ការលាងសម្អាតដៃ និងសម្ភារៈប្រើប្រាស់ជាមួយសាប៊ូឱ្យបានហ្មត់ចត់ក្រោយពេលប៉ះពាល់សាច់ឆៅ គឺជាជំហានសាមញ្ញបំផុតក្នុងការការពារសុខភាពគ្រួសារ និងទប់ស្កាត់ការរីករាលដាលនៃមេរោគនៅក្នុងផ្ទះបាយយ៉ាងមានប្រសិទ្ធភាពបំផុត៕