យោងតាមការផ្សាយពីប្រភពបរទេស ការទទួលទានផ្លែស្រកានាគដោយមិនខ្ជាក់គ្រាប់ចេញ គឺជាជម្រើសដ៏ត្រឹមត្រូវបំផុតសម្រាប់សុខភាព ព្រោះគ្រាប់ខ្មៅតូចៗទាំងនោះគឺជា “ឃ្លាំងផ្ទុកជីវជាតិ” ដែលរាងកាយមិនគួររំលង។
ថ្វីត្បិតតែវាមានទំហំតូចឆ្មារ ប៉ុន្តែវាសម្បូរទៅដោយអាស៊ីតខ្លាញ់មិនឆ្អែតដែលផ្តល់សុខភាពដល់បេះដូង ជាពិសេសគឺ អូមេហ្គា ៣ និង អូមេហ្គា ៦ ដែលជួយកាត់បន្ថយកម្រិតកូឡេស្តេរ៉ុលអាក្រក់ និងពង្រឹងសុខភាពសរសៃឈាមបេះដូងឱ្យកាន់តែមាំមួន។
ក្រៅពីសារធាតុខ្លាញ់ល្អ គ្រាប់ស្រកានាគដើរតួជា “អំបោសសម្អាតពោះវៀន” យ៉ាងស័ក្តិសមបំផុត។ ជាតិសរសៃដែលមាននៅក្នុងគ្រាប់ទាំងនេះ ជួយសម្រួលដល់ដំណើរការកន្ត្រាក់នៃប្រព័ន្ធរំលាយអាហារ បង្កើនម៉ាសលាមក និងការពារបញ្ហាទល់លាមកបានយ៉ាងមានប្រសិទ្ធភាព។ មិនតែប៉ុណ្ណោះ វាក៏ផ្ទុកនូវសារធាតុប្រឆាំងអុកស៊ីតកម្មដូចជា វីតាមីន E និងសមាសធាតុ Phenolics ដែលជួយការពារកោសិកាពីរ៉ាឌីកាល់សេរី បន្ថយការរលាកក្នុងរាងកាយ និងជួយឱ្យប្រព័ន្ធភាពស៊ាំដំណើរការបានល្អ។
ទោះជាយ៉ាងណា លោកអ្នកគួរកត់សម្គាល់នូវចំណុចប្រុងប្រយ័ត្នបន្តិចបន្តួចផងដែរ។ សម្រាប់អ្នកដែលមានបញ្ហាប្រព័ន្ធរំលាយអាហារខ្សោយខ្លាំង ឬមានជំងឺរលាកពោះវៀនធំ ការទទួលទានគ្រាប់ស្រកានាគច្រើនហួសកម្រិត អាចបណ្តាលឱ្យមានអាការៈហើមពោះ ឬឆ្អល់ពោះ ដោយសារជាតិសរសៃខ្ពស់របស់វា។ ម្យ៉ាងវិញទៀត សម្រាប់លោកអ្នកដែលប្រើប្រាស់ធ្មេញសិប្បនិម្មិត គ្រាប់តូចៗទាំងនេះអាចងាយនឹងជាប់តាមចន្លោះធ្មេញ បង្កជាការរំខាន។
សរុបមក ការញ៉ាំសាច់ស្រកានាគលាយជាមួយគ្រាប់ក្នុងបរិមាណសមល្មម គឺជាវិធីសាស្ត្រដ៏វិសេសក្នុងការទទួលបានជីវជាតិពេញលេញ ដើម្បីថែរក្សាសុខភាពបេះដូង និងប្រព័ន្ធរំលាយអាហារឱ្យនៅល្អប្រសើរជានិច្ច៕