យោងតាមការផ្សាយពីប្រភពបរទេស ការលេចឡើងនៃពពុះអណ្តែតលើផ្ទៃទឹកស៊ុបនៅពេលចម្អិនសាច់ ឬអាហារសមុទ្រ គឺជាបាតុភូតធម្មជាតិដែលបង្កឱ្យមានការជជែកវែកញែកយ៉ាងខ្លាំង។
តាមការវិភាគផ្នែកវិទ្យាសាស្ត្រ សមាសភាពនៃពពុះទាំងនោះគឺជាការកកនៃប្រូតេអ៊ីន ខ្លាញ់ ឈាមសត្វ និងសារធាតុរាវឡាំហ្វាទិចដែលរលាយចេញពីអាហារនៅពេលជួបសីតុណ្ហភាពខ្ពស់។ បើនិយាយឱ្យចំទៅ សារធាតុទាំងនេះមិនមានជាតិពុលនោះទេ ប៉ុន្តែការសម្រេចថាគួរទុក ឬគួរស្រង់ចេញ គឺអាស្រ័យលើអនាម័យនៃការរៀបចំអាហារតាំងពីដំបូង។
អ្នកជំនាញបានព្រមានថា បញ្ហាធំបំផុតគឺគ្មានអ្វីអាចធានាបានថា ឈាមសត្វ ឬអាហារទាំងនោះត្រូវបានលាងសម្អាតបានស្អាតល្អ ១០០% មុនពេលដាក់ចូលឆ្នាំងនោះទេ។ ពពុះទាំងនេះមិនត្រឹមតែអាចផ្ទុកនូវភាពមិនបរិសុទ្ធប៉ុណ្ណោះទេ ប៉ុន្តែវាក៏ជាប្រភពនៃក្លិនឆ្អាប និងរសជាតិមិនល្អ ដែលធ្វើឱ្យទឹកស៊ុបមានពណ៌ល្អក់កករ និងកាត់បន្ថយសោភណភាពនៃមុខម្ហូប។ ដូច្នេះ ការអនុវត្តដែលល្អបំផុតសម្រាប់សុខភាព និងរសជាតិ គឺការប្រើស្លាបព្រាស្រង់ពពុះទាំងនោះចេញឱ្យអស់ ជាពិសេសពពុះដំបូងៗដែលឡើងមក។
ដើម្បីទទួលបានទឹកស៊ុបដែលថ្លាឈ្វេង និងមានក្លិនឈ្ងុយ លោកអ្នកគួរអនុវត្តតាមវិធីសាស្ត្ររបស់ចុងភៅអាជីព ដោយការស្ងោរសាច់ក្នុងទឹកពុះមួយភ្លែត រួចចាក់ទឹកនោះចោលដើម្បីជម្រះជាតិឈាម និងកាកសំណល់ឡាំហ្វាទិចតាំងពីវគ្គដំបូង។
ការធ្វើបែបនេះមិនត្រឹមតែជួយឱ្យទឹកស៊ុបស្អាត និងមានរសជាតិសម្រិតសម្រាំងប៉ុណ្ណោះទេ ប៉ុន្តែថែមទាំងជួយកាត់បន្ថយហានិភ័យនៃសារធាតុមិនល្អដែលនៅសេសសល់ក្នុងចំណីអាហារផងដែរ៕