យោងតាមការចុះផ្សាយពីប្រភពបរទេស របបអាហារបែប «អ្នកមាន» ឬការញ៉ាំបែបសម្រាំង គឺជាទម្លាប់នៃការជ្រើសរើសទទួលទានតែផ្នែកណាដែលឆ្ងាញ់ និងមានជីវជាតិខ្ពស់បំផុត ហើយបោះចោលផ្នែកផ្សេងទៀតដែលគេយល់ថាគ្មានតម្លៃ ដូចជាការផឹកតែទឹកផ្លែឈើជំនួសការញ៉ាំទាំងមូល ឬការញ៉ាំតែសាច់សុទ្ធដោយបកស្បែក និងខ្លាញ់ចេញជាដើម។
ទោះបីជាវាមើលទៅហាក់ដូចជាមានអនាម័យ និងសម្បូរជីវជាតិ ប៉ុន្តែតាមទស្សនៈវេជ្ជសាស្ត្រ របបអាហារនេះមិនមានលក្ខណៈវិទ្យាសាស្ត្រទាំងស្រុងនោះទេ ហើយថែមទាំងអាចបង្កផលប៉ះពាល់ដល់រាងកាយទៀតផង។ ការចម្រាញ់អាហារជ្រុលពេក ធ្វើឱ្យរាងកាយបាត់បង់ជាតិសរសៃដ៏មានតម្លៃពីសំបកផ្លែឈើ ដែលជាភ្នាក់ងារជួយសម្រួលដល់ប្រព័ន្ធរំលាយអាហារ និងការពារការកើនឡើងជាតិស្ករក្នុងឈាមភ្លាមៗ ជាពិសេសសម្រាប់អ្នកជំងឺទឹកនោមផ្អែម។
លើសពីនេះ ការញ៉ាំតែអាហារទន់ៗ ឬអាហារចម្រាញ់ពេក ធ្វើឱ្យសកម្មភាពទំពារថយចុះ ដែលប៉ះពាល់ដល់ការបញ្ចេញទឹកមាត់ និងការសម្អាតធ្មេញតាមធម្មជាតិ ព្រមទាំងធ្វើឱ្យប្រព័ន្ធរំលាយអាហារដំណើរការមិនបានល្អបំផុត។ ការបោះចោលសំបក ឬខ្លាញ់សត្វទាំងស្រុង ក៏ជារឿងខ្ជះខ្ជាយសម្រាប់មនុស្សទូទៅដែលគ្មានបញ្ហាសុខភាព ព្រោះរាល់ផ្នែកនៃអាហារសុទ្ធតែមានតម្លៃអាហារូបត្ថម្ភរៀងៗខ្លួនប្រសិនបើប្រើប្រាស់ក្នុងបរិមាណសមល្មម។
ជារួម គ្មានរបបអាហារណាមួយដែលល្អឥតខ្ចោះសម្រាប់មនុស្សគ្រប់គ្នានោះទេ ប៉ុន្តែគន្លឹះនៃសុខភាពល្អ គឺការរួមផ្សំអាហារឱ្យមានតុល្យភាព ចម្រុះមុខ និងចម្អិនតាមវិធីផ្សេងៗគ្នា ដោយជ្រើសរើសអាហារដែលសមស្របទៅនឹងស្ថានភាពសុខភាពផ្ទាល់ខ្លួន ជាជាងការដើរតាមនិន្នាការញ៉ាំបែបសម្រាំងជ្រុលដែលនាំឱ្យបាត់បង់អត្ថប្រយោជន៍ពីធម្មជាតិ៕