យោងតាមការផ្សាយរបស់សារព័ត៌មានបរទេស អ័រម៉ូនតេស្តូស្តេរ៉ូនប្រៀបដូចជាម៉ាស៊ីនផ្ដល់ថាមពលដ៏សំខាន់សម្រាប់រាងកាយបុរស។ ទោះបីជាអ័រម៉ូននេះថយចុះតាមអាយុកាល ប៉ុន្តែអ្នកអាចថែទាំ និងបង្កើនវាឡើងវិញបានតាមរយៈទម្លាប់រស់នៅសាមញ្ញៗចំនួន ៥។
ចំណុចដំបូងដែលត្រូវធ្វើគឺ ការជៀសវាងគ្រឿងស្រវឹង ព្រោះវាជាសត្រូវធំដែលរារាំងការផលិតអ័រម៉ូន និងបំផ្លាញសុខភាពសរីរាង្គដទៃទៀត។ បន្ទាប់មកគឺ ការហាត់ប្រាណបែបលើកទម្ងន់ ដែលមិនត្រឹមតែជួយឱ្យសាច់ដុំរឹងមាំប៉ុណ្ណោះទេ ប៉ុន្តែថែមទាំងជួយជំរុញឱ្យរាងកាយផលិតអ័រម៉ូនបុរសបានកាន់តែច្រើនផងដែរ។
ក្រៅពីសកម្មភាពរាងកាយ ការគ្រប់គ្រងផ្លូវចិត្តមិនឱ្យតានតឹង ក៏ជារឿងចាំបាច់ ព្រោះភាពស្ត្រេសនឹងបញ្ចេញអ័រម៉ូនម្យ៉ាងមកបង្ក្រាបអ័រម៉ូនបុរសឱ្យធ្លាក់ចុះ។ ទន្ទឹមនឹងនេះ ការជ្រើសរើសរបបអាហារដែលមានតុល្យភាព និង ការគេងឱ្យបានគ្រប់គ្រាន់ពី ៧ ទៅ ៨ ម៉ោង ក្នុងមួយយប់ គឺជាគន្លឹះមាសក្នុងការរក្សាតុល្យភាពអ័រម៉ូនឱ្យនៅកម្រិតធម្មតា។ ការអនុវត្តទម្លាប់ល្អៗទាំងនេះ នឹងជួយពន្យារភាពចាស់នៃរាងកាយ និងរក្សាថាមពលរបស់អ្នកឱ្យនៅស្រស់ស្រាយដូចវ័យក្មេងជានិច្ច៕