យោងតាមការផ្សាយរបស់សារព័ត៌មានបរទេស មនុស្សជាច្រើនយល់ថាការលាងសម្អាតរបស់របរភ្លាមៗក្រោយប្រើរួច គឺជាទម្លាប់ល្អនៃអនាម័យ ប៉ុន្តែការពិតទៅ របស់របរមួយចំនួនអាចនឹងខូចគុណភាព ឬបាក់បែកយ៉ាងងាយដោយសារការប្រែប្រួលសីតុណ្ហភាពភ្លាមៗ។
ខាងក្រោមនេះគឺជាបញ្ជីរបស់របរដែលអ្នកគួរទុកឱ្យ “ត្រជាក់” សិន មុននឹងដាក់ចុះក្នុងទឹក៖
របស់ដែលគ្រោះថ្នាក់បំផុតគឺ ខ្ទះ និងថាសដុតនំដែលនៅក្ដៅខ្លាំង ជាពិសេសខ្ទះដែលមានសារធាតុប្រឆាំងការស្អិត។ ការចាក់ទឹកត្រជាក់លើខ្ទះក្ដៅភ្លាមៗ នឹងធ្វើឱ្យលោហៈរួញខ្លួនយ៉ាងលឿន បណ្ដាលឱ្យខ្ទះវៀច រលាត់ថ្នាំកូត ឬខូចទ្រង់ទ្រាយ។ ដូចគ្នានេះដែរ កែវជ័រ ឬកែវកញ្ចក់ ដែលទើបដាក់ភេសជ្ជៈក្ដៅៗ អាចនឹងប្រេះបែកខ្ទេច ឬរលាយទ្រង់ទ្រាយ ប្រសិនបើវាប៉ះនឹងទឹកត្រជាក់ភ្លាមៗ។
ចំពោះឧបករណ៍ប្រើប្រាស់ផ្សេងទៀតដូចជា កាំបិតផ្ទះបាយ ការលាងទាំងនៅក្ដៅអាចធ្វើឱ្យមុខកាំបិតឆាប់រឹល និងខូចដង។ រីឯឧបករណ៍អគ្គិសនីដូចជា ម៉ាស៊ីនឆុងកាហ្វេ ឬកំសៀវអគ្គិសនី លោកអ្នកត្រូវតែដកឌុយចេញ និងទុកឱ្យវាត្រជាក់ចុះសិន ដើម្បីការពារកុំឱ្យខូចគ្រឿងបន្លាស់អេឡិចត្រូនិចខាងក្នុងដោយសារសំណើម និងកម្ដៅ។
សរុបមក ការអត់ធ្មត់រង់ចាំតែប៉ុន្មាននាទីឱ្យរបស់របរត្រជាក់ដល់សីតុណ្ហភាពធម្មតា នឹងជួយឱ្យអ្នកសន្សំថវិកាបានយ៉ាងច្រើនពីការទិញរបស់ថ្មីមកជំនួស៕