យោងតាមការផ្សាយរបស់សារព័ត៌មានបរទេស បញ្ហាក្លិនស្អុយចេញពីធុងសំរាម គឺជាការរំខានដ៏ធំមួយនៅក្នុងផ្ទះ ជាពិសេសសម្រាប់អ្នករស់នៅខុនដូ ឬផ្ទះដែលមានលំហខ្យល់ចេញចូលតិច។
ទោះបីជាយើងយកសំរាមទៅចោលរាល់ថ្ងៃក៏ដោយ ក៏ក្លិនមិនល្អនៅតែអាចដក់ជាប់នៅក្នុងធុង។ ដំណោះស្រាយដ៏សាមញ្ញ និងចំណាយតិចបំផុតនោះគឺ ការប្រើ “សំឡីជ្រលក់ប្រេងក្រអូប” ដែលមិនត្រឹមតែជួយបំបាត់ក្លិនស្អុយបានយូរ ប៉ុន្តែថែមទាំងមានសមត្ថភាពប្រឆាំងបាក់តេរី និងផ្សិតដែលជាប្រភពនៃក្លិនទៀតផង។
វិធីអនុវត្តគឺងាយស្រួលបំផុត ដោយអ្នកគ្រាន់តែយកសំឡី ២ ទៅ ៣ ដុំ មកជ្រលក់ជាមួយប្រេងក្រអូបពី ៥ ទៅ ១០ ដំណក់ រួចដាក់វាទៅបាតធុងសំរាមមុននឹងដាក់ថង់ប្លាស្ទិកពីលើ។ ការជ្រើសរើសក្លិនប្រេងក្រអូបក៏ផ្ដល់ផលប្រយោជន៍ខុសៗគ្នាដែរ ដូចជា ក្លិនក្រូចឆ្មារ ជួយឱ្យមានអារម្មណ៍ស្រស់ស្រាយ ក្លិនយូកាលីបតូស ជួយបំបាត់ក្លិនឆ្អាតសាច់ត្រីបានយ៉ាងល្អ និង ក្លិនជីរអង្កាម ដែលមានសមត្ថភាពពិសេសអាចដេញសត្វល្អិត កន្លាត និងកណ្តុរមិនឱ្យមកជិតធុងសំរាមរបស់អ្នក។
រាល់ពេលដែលអ្នកបើកគម្របធុង ក្លិនក្រអូបប្រហើរនឹងជួយឱ្យបរិយាកាសក្នុងផ្ទះបាយកាន់តែមានផាសុកភាព៕