​ទឹកខ្មេះប៉ោម​៖ ភេសជ្ជៈសុខភាព​ និងអាថ៌កំបាំងកម្ចាត់ខ្លាញ់ដែលអ្នកមិនគួររំលង​

យោងតាមការផ្សាយរបស់សារព័ត៌មានបរទេស ទឹកខ្មេះប៉ោមបានក្លាយជាភេសជ្ជៈជម្រើសលេខមួយសម្រាប់អ្នកស្រឡាញ់សុខភាព ដោយសារវាសម្បូរទៅដោយវីតាមីន B និងសារធាតុប្រឆាំងអុកស៊ីតកម្មខ្ពស់។

អត្ថប្រយោជន៍ដ៏អស្ចារ្យបំផុតដែលធ្វើឱ្យវាល្បីល្បាញ គឺសមត្ថភាពជួយសម្រកទម្ងន់តាមរយៈការធ្វើឱ្យយើងមានអារម្មណ៍ឆ្អែតបានយូរ កាត់បន្ថយការឃ្លានអាហារផ្ដេសផ្ដាស និងជួយកាត់បន្ថយទំហំចង្កេះយ៉ាងមានប្រសិទ្ធភាពក្នុងរយៈពេលត្រឹមតែ ១២ សប្តាហ៍។ លើសពីនេះ វាក៏ជាជំនួយការដ៏ពូកែសម្រាប់អ្នកជំងឺទឹកនោមផ្អែមប្រភេទទី២ ក្នុងការគ្រប់គ្រងកម្រិតជាតិស្ករក្នុងឈាម និងកែលម្អប្រព័ន្ធមេតាប៉ូលីសឱ្យកាន់តែរឹងមាំ។

ក្រៅពីជួយរាងស្លីម ទឹកខ្មេះប៉ោមក៏មានសមត្ថភាពកម្ចាត់បាក់តេរីអាក្រក់ និងជួយពង្រឹងសុខភាពបេះដូងដោយការកាត់បន្ថយជាតិខ្លាញ់អាក្រក់ក្នុងឈាម។ ចំពោះអ្នកដែលមានបញ្ហាស្ងួត ឬរមាស់ស្បែក ទឹកខ្មេះប្រភេទនេះជួយរក្សាតុល្យភាព pH និងពង្រឹងរបាំងការពារស្បែកបានយ៉ាងល្អ។ ទោះជាយ៉ាងណា ដើម្បីប្រើប្រាស់ឱ្យមានសុវត្ថិភាព លោកអ្នកគួរទទួលទានត្រឹម ១ ទៅ ២ ស្លាបព្រាបាយក្នុងមួយថ្ងៃ ដោយដាច់ខាតត្រូវលាយជាមួយទឹកស្អាតជានិច្ច ដើម្បីការពារការរលាកបំពង់អាហារ និងការបំផ្លាញស្រទាប់ធ្មេញពីជាតិអាស៊ីតរបស់វា។

ការយល់ដឹងពីរបៀបប្រើប្រាស់ត្រឹមត្រូវ នឹងបំប្លែងទឹកខ្មេះប៉ោមឱ្យទៅជាឱសថទិព្វសម្រាប់សុខភាពរាងកាយទាំងមូល​៕