យោងតាមការផ្សាយរបស់សារព័ត៌មានបរទេស ការសម្រេចចិត្តកាត់បាយ (ជាតិម្សៅ) ហើយងាកមកញ៉ាំតែសាច់ និងខ្លាញ់ដើម្បីសម្រកទម្ងន់ ឬដែលគេហៅថា របបអាហារ Keto (Ketogenic Diet) កំពុងមានប្រជាប្រិយភាពខ្លាំងព្រោះវាជួយឱ្យស្រកទម្ងន់បានលឿន។
នៅពេលរាងកាយខ្វះជាតិស្ករ វានឹងចាប់ផ្ដើមដុតបំផ្លាញជាតិខ្លាញ់មកធ្វើជាថាមពលជំនួសវិញ។ ប៉ុន្តែអ្នកត្រូវដឹងថា វិធីសាស្ត្រ “ផ្លូវកាត់” នេះ អាចបង្កប់នូវគ្រោះថ្នាក់ដែលអ្នកនឹកស្មានមិនដល់ ប្រសិនបើអនុវត្តមិនបានត្រឹមត្រូវ។
ការញ៉ាំសាច់ និងខ្លាញ់ច្រើនពេកក្នុងរយៈពេលវែង អាចធ្វើឱ្យកម្រិតកូឡេស្តេរ៉ុលអាក្រក់ហក់ឡើងខ្ពស់ ដែលជាសត្រូវលេខមួយនៃសុខភាពបេះដូង និងសរសៃឈាម។ លើសពីនេះ រាងកាយអាចនឹងលើសជាតិអាស៊ីតអ៊ុយរិក (បង្កជំងឺហឺត/ហើមសន្លាក់) បាត់បង់ជាតិកាល់ស្យូម និងដាក់សម្ពាធយ៉ាងធ្ងន់ធ្ងរដល់មុខងារថ្លើម និងតម្រងនោម។ ចំពោះអ្នកដែលមានបញ្ហាខ្លាញ់ក្នុងឈាម ឬជំងឺបេះដូងស្រាប់ ការអនុវត្តរបបអាហារនេះដោយគ្មានការពិគ្រោះជាមួយគ្រូពេទ្យ គឺប្រៀបដូចជាការដាក់ “គ្រាប់បែកពេលវេលា” ឱ្យសុខភាពខ្លួនឯងទៅវិញ។
ដើម្បីសម្រកទម្ងន់ប្រកបដោយសុវត្ថិភាព និងចីរភាព អ្នកជំនាញណែនាំឱ្យរក្សា “តុល្យភាពអាហារ”។ អ្នកមិនចាំបាច់ផ្ដាច់បាយទាំងស្រុងនោះទេ ប៉ុន្តែត្រូវកាត់បន្ថយបរិមាណកាឡូរីដែលញ៉ាំចូល ជ្រើសរើសខ្លាញ់ល្អពីប្រេងរុក្ខជាតិ និងរួមផ្សំជាមួយការហាត់ប្រាណឱ្យបានទៀងទាត់។ ការសម្រកទម្ងន់ដែលល្អបំផុត មិនមែនជាការបង្អត់អាហារក្រុមណាមួយឡើយ ប៉ុន្តែគឺជាការញ៉ាំឱ្យត្រូវសមាមាត្រ និងមានវិន័យក្នុងការរស់នៅ៕