យោងតាមការផ្សាយរបស់សារព័ត៌មានបរទេស ស៊ុតមាន់មិនត្រឹមតែជាអាហារងាយរក និងមានតម្លៃសមរម្យប៉ុណ្ណោះទេ ប៉ុន្តែយោងតាមការស្រាវជ្រាវថ្មីៗដែលចុះផ្សាយក្នុងទិនានុប្បវត្តិ Nutrients ឆ្នាំ២០២៥ វាគឺជា “អាហារទិព្វ” ដែលជួយពន្យារអាយុជីវិតបានយ៉ាងអស្ចារ្យ។
ការញ៉ាំស៊ុតឱ្យបាន ១ ទៅ ៦ គ្រាប់ក្នុងមួយសប្តាហ៍ អាចជួយកាត់បន្ថយហានិភ័យនៃការស្លាប់ដោយសារជំងឺសរសៃឈាមបេះដូងបានដល់ទៅ ២៩% និងកាត់បន្ថយគ្រោះថ្នាក់នៃការស្លាប់ដោយសារមូលហេតុផ្សេងៗបាន ១៥%។ លើសពីនេះ សម្រាប់អ្នកដែលញ៉ាំស៊ុតចាប់ពី ៥ គ្រាប់ឡើងទៅក្នុងមួយសប្តាហ៍ ក៏អាចកាត់បន្ថយហានិភ័យនៃជំងឺលើសឈាមបាន ៣២% និងជំងឺទឹកនោមផ្អែមបាន ២៨% ផងដែរ។
ដើម្បីទទួលបានអត្ថប្រយោជន៍ជាអតិបរមា លោកអ្នកគួរដឹងពីបរិមាណដែលស័ក្តិសមសម្រាប់រាងកាយ៖
សម្រាប់មនុស្សពេញវ័យដែលមានសុខភាពល្អ ការញ៉ាំស៊ុត ១ គ្រាប់ក្នុងមួយថ្ងៃ គឺជាកម្រិតដ៏ល្អបំផុត។ ចំពោះកុមារ ស្រ្តីមានផ្ទៃពោះ ឬអ្នកហាត់ប្រាណយកសាច់ដុំ អាចបង្កើនដល់ ១ ទៅ ២ គ្រាប់ក្នុងមួយថ្ងៃដើម្បីទទួលបានប្រូតេអ៊ីនគ្រប់គ្រាន់។ ទោះជាយ៉ាងណាក៏ដោយ សម្រាប់អ្នកដែលមានជាតិខ្លាញ់ក្នុងឈាមខ្ពស់ ឬមានជំងឺបេះដូង មិនចាំបាច់ផ្ដាច់ស៊ុតទាំងស្រុងនោះទេ ប៉ុន្តែគួរកំណត់ត្រឹម ១ គ្រាប់រៀងរាល់ ២ ថ្ងៃម្ដង ដើម្បីរក្សាតុល្យភាពសុខភាព។
វិធីសាស្ត្រចម្អិនក៏ជាគន្លឹះសំខាន់មិនអាចរំលងបានឡើយ ដោយអ្នកជំនាញអាហារូបត្ថម្ភបានផ្ដល់ចំណាត់ថ្នាក់លេខ ១ ទៅឱ្យ “ស៊ុតស្ងោរ” ព្រោះវាជួយរក្សាសារធាតុចិញ្ចឹមបានពេញលេញ ងាយស្រួលដល់ការស្រូបយករបស់រាងកាយ និងមិនមានជាតិខ្លាញ់លើសពីការចៀន។ ក្រៅពីនេះ ការញ៉ាំស៊ុតចំហុយ ឬស៊ុបស៊ុត ក៏ជាជម្រើសដ៏ល្អដែលជួយឱ្យអ្នកមិនងាយធុញទ្រាន់។
ការចាប់ផ្ដើមទម្លាប់ញ៉ាំស៊ុតក្នុងបរិមាណត្រឹមត្រូវ រួមជាមួយរបបអាហារដែលមានបន្លែ និងផ្លែឈើ គឺជាយុទ្ធសាស្ត្រដ៏សាមញ្ញបំផុតដើម្បីរស់នៅបានយូរ និងមានសុខភាពមាំមួន៕