យោងតាមការផ្សាយរបស់សារព័ត៌មានបរទេស មនុស្សភាគច្រើនចូលចិត្តញ៉ាំចេកស្រស់ ប៉ុន្តែអ្នកប្រហែលជាមិនធ្លាប់ដឹងទេថា ការយកចេកទៅ “ស្ងោរ” គឺជាវិធីសាស្ត្រមួយដ៏ល្អបំផុតក្នុងការបង្កើនតម្លៃអាហារូបត្ថម្ភ និងជួយដល់សុខភាពលើសពីការរំពឹងទុក។ ចេកស្ងោរមិនត្រឹមតែជាអាហារសម្រន់ដ៏ពេញនិយមក្នុងតំបន់អាស៊ី និងអាហ្វ្រិកប៉ុណ្ណោះទេ ប៉ុន្តែវាគឺជាជំនួយការពិសេសសម្រាប់ប្រព័ន្ធរំលាយអាហារ និងការគ្រប់គ្រងទម្ងន់។
អត្ថប្រយោជន៍ដ៏លេចធ្លោនៃការញ៉ាំចេកស្ងោរ (ជាពិសេសចេកខ្ចី ឬចេកជិតទុំ) គឺវត្តមានរបស់ ម្សៅធន់នឹងការរំលាយ និង ជាតិសរសៃ។ សារធាតុទាំងនេះមានតួនាទីយ៉ាងសំខាន់ក្នុងការជួយឱ្យអ្នកមានអារម្មណ៍ឆ្អែតបានយូរ កាត់បន្ថយការឃ្លានផ្ដេសផ្ដាស និងការពារការហក់ឡើងនៃជាតិស្ករក្នុងឈាមភ្លាមៗ ដែលជាជម្រើសដ៏ល្អសម្រាប់អ្នកចង់សម្រកទម្ងន់ និងអ្នកជំងឺទឹកនោមផ្អែម។ លើសពីនេះ វាក៏ដើរតួជា “អាហារ” សម្រាប់បាក់តេរីល្អក្នុងពោះវៀន ជួយឱ្យប្រព័ន្ធរំលាយអាហារដំណើរការបានយ៉ាងរលូន និងការពារមហារីកពោះវៀនធំទៀតផង។
ទោះបីជាការស្ងោរអាចធ្វើឱ្យបាត់បង់វីតាមីន C បន្តិចបន្តួចក៏ដោយ ប៉ុន្តែវានៅតែរក្សាបាននូវសារធាតុរ៉ែសំខាន់ៗដូចជា ប៉ូតាស្យូម ដែលជួយដល់សុខភាពបេះដូង និង ម៉ាញ៉េស្យូម ដែលជួយដល់ប្រព័ន្ធសាច់ដុំ និងសរសៃប្រសាទ។ ប្រសិនបើលោកអ្នកចង់បានថាមពលបន្ថែមដើម្បីបង្កើនភាពស្រស់ថ្លា ការជ្រើសរើសចេកទុំស្ងោរគឺជារឿងដ៏ត្រឹមត្រូវ ព្រោះវាសម្បូរទៅដោយជាតិស្ករធម្មជាតិដែលរាងកាយងាយស្រូបយក។
ចងចាំថា ដើម្បីទទួលបានសុខភាពល្អពិតប្រាកដ លោកអ្នកគួរញ៉ាំចេកស្ងោរដោយមិនបន្ថែមស្ករ ឬអំបិលច្រើនពេកឡើយ៕