យោងតាមការផ្សាយរបស់សារព័ត៌មានបរទេស សម្រាប់បុគ្គលិកការិយាល័យដែលជៀសមិនផុតពីការធ្វើការយប់ជ្រៅ ការគេងមិនគ្រប់គ្រាន់គឺជាសត្រូវលាក់មុខដែលធ្វើឱ្យអ័រម៉ូនឃ្លានកើនឡើង ខុសប្រក្រតី និងបង្កឱ្យមានក្បាលពោះ។
ដើម្បីការពាររាងកាយកុំឱ្យចុះទ្រុឌទ្រោម លោកអ្នកគួរចាប់ផ្ដើមពីការជ្រើសរើសអាហារសម្រន់ពេលយប់ដែលសម្បូរប្រូតេអ៊ីន និងជាតិសរសៃដូចជា ទឹកដោះគោជូរក្រិក ស៊ុតឆ្អិន ឬគ្រាប់អាល់ម៉ុន ជំនួសឱ្យមីកញ្ចប់ ឬនំស្រួយ ដែលជួយឱ្យឆ្អែតបានយូរ និងមិនបង្កជាខ្លាញ់ដក់តាមចង្កេះ។ ទន្ទឹមនឹងនេះ ការផឹកទឹកស្អាតឱ្យបានញឹកញាប់ពេញមួយយប់ គឺជាគន្លឹះដ៏សំខាន់ដើម្បីការពារការខ្សោះជាតិទឹក និងជួយឱ្យខួរក្បាលមិនច្រឡំរវាងអារម្មណ៍ស្រេកទឹក និងការឃ្លានអាហារ។
ក្រៅពីរបបអាហារ ការគ្រប់គ្រងការប្រើប្រាស់ជាតិកាហ្វេអ៊ីនក៏ជារឿងមិនអាចរំលងបានដែរ ដោយលោកអ្នកគួរចៀសវាងកាហ្វេនៅពេលរសៀល ឬពេលយប់ជ្រៅ ហើយប្តូរមកញ៉ាំតែរុក្ខជាតិគ្មានជាតិកាហ្វេអ៊ីនវិញ ដើម្បីរក្សាគុណភាពនៃការគេងឱ្យបានជ្រៅបំផុតតាមដែលអាចធ្វើទៅបាន។ នៅព្រឹកបន្ទាប់ គួរចាប់ផ្ដើមថ្ងៃថ្មីជាមួយអាហារដែលងាយរំលាយដូចជា ស្រូវសាលី និងផ្លែឈើស្រស់ ដើម្បីដាស់ប្រព័ន្ធមេតាបូលីសឱ្យដំណើរការឡើងវិញ និងចៀសវាងអាហារដែលមានជាតិស្ករខ្ពស់ដែលធ្វើឱ្យអ្នកកាន់តែអស់កម្លាំងនៅពេលរសៀល។
ចំពោះការហាត់ប្រាណក្នុងថ្ងៃដែលគេងមិនគ្រប់ លោកអ្នកមិនគួរប្រើកម្លាំងខ្លាំងពេកនោះទេ ប៉ុន្តែគួរជ្រើសរើសការធ្វើចលនាស្រាលៗដូចជា យូហ្គា ឬការដើរគ្រវីដៃ ដើម្បីជួយដល់ចរន្តឈាមដោយមិនដាក់សម្ពាធលើរាងកាយដែលកំពុងហត់នឿយ។ ជាចុងក្រោយ ការឆ្លៀតគេងមួយភាំងខ្លីៗប្រហែល ១៥ ទៅ ២០ នាទីក្នុងកំលុងពេលថ្ងៃ នឹងជួយកាត់បន្ថយអរម៉ូនស្ត្រេស និងធ្វើឱ្យខួរក្បាលស្រឡះល្អក្នុងការគ្រប់គ្រងចំណង់អាហារ។
ការអនុវត្តតិកនិកទាំងនេះ នឹងជួយឱ្យអ្នករក្សាបាននូវរូបរាងស្លីមស្អាត និងសុខភាពមាំមួន ទោះបីជាមានកាលវិភាគការងារមមាញឹកយ៉ាងណាក៏ដោយ៕