យោងតាមការផ្សាយរបស់សារព័ត៌មានបរទេស ការជឿតាមពាក្យចចាមអារ៉ាមលើបណ្ដាញសង្គមអាចក្លាយជាអាវុធមុខពីរដែលបំផ្លាញសុខភាពដោយមិនដឹងខ្លួន។
ជាក់ស្តែងមានស្ត្រីម្នាក់ដែលមានជំងឺទឹកនោមផ្អែម បានសម្រេចចិត្តញ៉ាំតែស្ពៃក្ដោបរៀងរាល់ថ្ងៃអស់រយៈពេល ៣ ខែ ដោយសង្ឃឹមថាជាតិស្ករនឹងស្រកចុះ ប៉ុន្តែលទ្ធផលតេស្តចុងក្រោយបានបង្ហាញថាជាតិស្កររបស់នាងកើនឡើងខ្ពស់ដល់កម្រិតអាសន្នទៅវិញ។ មូលហេតុចម្បងគឺដោយសារការញ៉ាំអាហារដដែលៗម្តងហើយម្តងទៀត បង្កឱ្យរាងកាយខ្វះសារធាតុចិញ្ចឹមចាំបាច់ដូចជាប្រូតេអ៊ីន និងខ្លាញ់ល្អ ដែលធ្វើឱ្យប្រព័ន្ធមេតាបូលីសមិនប្រក្រតី និងបង្កើនភាពធន់នឹងអាំងស៊ុយលីនកាន់តែធ្ងន់ធ្ងរ។ ម្យ៉ាងវិញទៀត ការបង្អត់អាហារផ្សេងៗនាំឱ្យរាងកាយឃ្លានខ្លាំងហួសកម្រិត រហូតធ្វើឱ្យនាងលួចញ៉ាំបង្អែម ឬបាយបន្ថែមលើសចំណុះ ដែលជាហេតុធ្វើឱ្យជាតិស្ករហក់ឡើងឥតឈប់ឈរ។
ដើម្បីគ្រប់គ្រងជាតិស្ករក្នុងឈាមឱ្យមានប្រសិទ្ធភាព និងមានសុវត្ថិភាព អ្នកជំនាញបានណែនាំឱ្យអនុវត្តក្បួន “ញ៉ាំឥន្ទធនូ” ដោយជ្រើសរើសអាហារឱ្យមាន ៥ ពណ៌ចម្រុះគ្នា ដើម្បីទទួលបានវីតាមីនគ្រប់គ្រាន់ និងជួយឱ្យសរសៃឈាមមាំមួន។ អ្វីដែលកាន់តែពិសេសនោះគឺការញ៉ាំតាមលំដាប់លំដោយនៃអាហារ ដោយលោកអ្នកគួរចាប់ផ្ដើមញ៉ាំបន្លែមុនគេ បន្ទាប់មកញ៉ាំប្រូតេអ៊ីនដូចជា ត្រី សាច់ ឬតៅហ៊ូ ហើយចុងក្រោយទើបញ៉ាំកាបូអ៊ីដ្រាតដូចជាបាយ ឬនំប៉័ង។ បច្ចេកទេសមាសនេះនឹងជួយឱ្យជាតិស្ករកើនឡើងយឺតៗ និងមានស្ថិរភាពបំផុតក្រោយពេលញ៉ាំរួច។
ក្រៅពីរបបអាហារ ការផ្លាស់ប្តូរទម្លាប់រស់នៅបន្តិចបន្តួចដូចជាការផឹកទឹកក្ដៅឧណ្ហៗក្រោយភ្ញាក់ពីគេង និងការធ្វើចលនាស្រាលៗក្រោយញ៉ាំអាហាររួច ក៏ជួយឱ្យសាច់ដុំប្រើប្រាស់ជាតិស្ករបានយ៉ាងមានប្រសិទ្ធភាពផងដែរ។ ទន្ទឹមនឹងនេះ ការគ្រប់គ្រងភាពតានតឹងគឺជាកត្តាចាំបាច់ ព្រោះអ័រម៉ូនស្ត្រេសគឺជាសត្រូវលាក់មុខដែលជំរុញឱ្យជាតិស្ករឡើងខ្ពស់។
ចងចាំថាគ្មានអាហារតែមួយមុខណាជា “ថ្នាំទិព្វ” ដែលអាចព្យាបាលគ្រប់យ៉ាងបានឡើយ មានតែការញ៉ាំឱ្យមានតុល្យភាព និងការរស់នៅដោយមានវិន័យប៉ុណ្ណោះ ទើបជាផ្លូវឆ្ពោះទៅរកសុខភាពល្អពិតប្រាកដ៕