យោងតាមការផ្សាយរបស់សារព័ត៌មានបរទេស មនុស្សភាគច្រើនយល់ថាការលាងបន្លែឱ្យស្អាតមុនពេលយកទៅក្លាសេគឺជាអនាម័យល្អ និងជួយសន្សំសំចៃពេលវេលា ប៉ុន្តែការពិតសម្រាប់បន្លែមួយចំនួន សំណើមគឺជាសត្រូវធំបំផុតដែលធ្វើឱ្យពួកវាឆាប់រលួយ ក្រៀមស្វិត និងដុះផ្សិតលឿនជាងធម្មតា។
បន្លែស្លឹកដូចជា សាលាដ និងស្ពៃខ្មៅ មានស្លឹកទន់ដែលងាយស្រូបសំណើមខ្លាំង ដូច្នេះប្រសិនបើអ្នកលាងវាមុនពេលរក្សាទុក វានឹងធ្វើឱ្យស្លឹករលួយជាំយ៉ាងឆាប់រហ័ស។ ចំពោះបន្លែដែលមានផ្កាកញ្ចុំដូចជា ប្រូខូលី និងផ្កាខាត់ណា ពួកវាអាចដក់ទឹកនៅចន្លោះផ្កាតូចៗ ដែលបណ្ដាលឱ្យវារលួយពីក្នុងមកក្រៅដោយយើងមិនអាចមើលដឹងពីខាងក្រៅឡើយ។
ក្រៅពីនេះ ក្រុមបន្លែក្លិនប្រហើរ និងជាឱសថដូចជា ជីរអង្កាម ជីរនាងវង និងខ្ទឹមបារាំងខ្ចីងាយនឹងប្រែពណ៌ជាំខ្មៅ និងរលួយទន់ណាស់ប្រសិនបើមានសំណើមជាប់ស្លឹក សូម្បីតែបន្លែក្នុងដីដូចជា ការ៉ុត និងឆៃថាវ ក៏ងាយដុះផ្សិតដែរប្រសិនបើសំបករបស់វាសើមក្នុងទូទឹកកក។ វិធីសាស្ត្រដែលត្រឹមត្រូវបំផុតគឺត្រូវរក្សាទុកបន្លែទាំងនេះក្នុងសភាពស្ងួត ដោយគ្រាន់តែរុំជាមួយក្រដាសជូតមាត់ ឬកាសែត រួចដាក់ក្នុងថង់បិទជិតដើម្បីរក្សាសំណើមធម្មជាតិរបស់វា។
ការលាងសម្អាតគួរធ្វើឡើងតែនៅពេលដែលជិតដល់ពេលយកទៅចម្អិនប៉ុណ្ណោះ ដែលវាមិនត្រឹមតែជួយរក្សាវីតាមីនបានល្អប៉ុណ្ណោះទេ ប៉ុន្តែថែមទាំងជួយសន្សំសំចៃថវិកាដោយចៀសវាងការបោះចោលបន្លែដែលរលួយមុនកាលកំណត់៕