យោងតាមការផ្សាយរបស់សារព័ត៌មានបរទេស ការចំណាយតិចតួចលើរបស់របរប្រើប្រាស់ដដែលៗជារៀងរាល់ថ្ងៃ គឺជាមូលហេតុចម្បងដែលធ្វើឱ្យលុយរបស់អ្នកបាត់បង់ដោយមិនដឹងខ្លួន។
ការប្តូរទម្លាប់ពីការប្រើប្រាស់របស់របរប្រើម្ដងបោះចោល ដូចជាដបទឹកប្លាស្ទិក ឡាមកោរពុកមាត់ថោកៗ ក្រដាសជូតសើម ឬថ្មពិលធម្មតា មកជាការប្រើប្រាស់ដបទឹកផ្ទាល់ខ្លួន ម៉ាស៊ីនកោរអគ្គិសនី ក្រណាត់ស្អាតដែលអាចបោកទឹកបាន និងថ្មពិលប្រភេទសាកថ្ម គឺជាគន្លឹះដ៏ឆ្លាតវៃក្នុងការសន្សំលុយបានយ៉ាងច្រើនក្នុងរយៈពេលវែង។ ការវិនិយោគលើរបស់របរដែលអាចប្រើឡើងវិញបាន មិនត្រឹមតែជួយកាត់បន្ថយការចំណាយដែលមើលមិនឃើញប៉ុណ្ណោះទេ ប៉ុន្តែថែមទាំងជួយកាត់បន្ថយកាកសំណល់ដល់បរិស្ថានយ៉ាងមានប្រសិទ្ធភាពទៀតផង។
ទន្ទឹមនឹងនេះ ការជ្រើសរើសទិញរបស់ដែលមានគុណភាពខ្ពស់ ក៏ជាយុទ្ធសាស្ត្រសន្សំសំចៃមួយដែរ ព្រោះរបស់របរគុណភាពអន់ដូចជា អេប៉ុងលាងចាន ខ្សែសាកទូរស័ព្ទ ប្រអប់ជ័រថោកៗ និងសម្លៀកបំពាក់គ្មានស្តង់ដា តែងតែឆាប់ខូចខាតដែលតម្រូវឱ្យអ្នកត្រូវចំណាយលុយទិញថ្មីម្ដងហើយម្ដងទៀត។ បន្ថែមពីនេះ លោកអ្នកគួរចៀសវាងការទិញទឹកសម្អាតឯកទេសច្រើនដបសម្រាប់គ្រប់ជ្រុងនៃផ្ទះ ដោយជំនួសមកវិញនូវការប្រើប្រាស់ទឹកសម្អាតពហុបំណងតែមួយមុខក៏គ្រប់គ្រាន់។ ការតុបតែងផ្ទះក៏ដូចគ្នាដែរ ការជ្រើសរើសរចនាបថបែបសាមញ្ញដែលមិនងាយជោកជាំតាមសម័យកាល នឹងជួយឱ្យអ្នកមិនចាំបាច់ដោះដូរគ្រឿងតុបតែងញឹកញាប់។
ការសន្សំសំចៃមិនមែនជារឿងពិបាកឡើយ វាគ្រាន់តែជាការផ្លាស់ប្តូរពីការទិញតាមអារម្មណ៍ មកជាការទិញដោយប្រុងប្រយ័ត្ន និងផ្ដោតលើតម្លៃនៃការប្រើប្រាស់បានយូរអង្វែង៕