យោងតាមការផ្សាយរបស់សារព័ត៌មានបរទេស ជាតិស្ករគឺជាប្រភពថាមពលសម្រាប់រាងកាយ ប៉ុន្តែការញ៉ាំច្រើនហួសប្រមាណគឺជាដើមហេតុនៃជំងឺធាត់ និងអតុល្យភាពអ័រម៉ូន។
ទោះបីជាស្ករមិនធ្វើឱ្យដុំសាច់រីកធំដោយផ្ទាល់ ប៉ុន្តែវាជម្រុញឱ្យរាងកាយផលិតអាំងស៊ុយលីន និងសារធាតុ IGF-1 កាន់តែច្រើន ដែលជាភ្នាក់ងារជួយឱ្យកោសិកាមហារីកបំបែកខ្លួនកាន់តែលឿន។ លើសពីនេះ ជាតិស្ករខ្ពស់បង្កឱ្យមានការរលាករ៉ាំរ៉ៃ និងស្រ្តេសអុកស៊ីតកម្ម ដែលអាចបំផ្លាញ DNA និងបង្កើតកោសិកាមិនធម្មតា។
ទោះជាយ៉ាងណា ការផ្ដាច់ជាតិស្ករទាំងស្រុងមិនមែនជាដំណោះស្រាយឡើយ ព្រោះរាងកាយនៅតែត្រូវការថាមពលដើម្បីស្ដារសុខភាព។ គន្លឹះសំខាន់គឺការផ្លាស់ប្តូរទម្លាប់ញ៉ាំ ដោយកាត់បន្ថយភេសជ្ជៈផ្អែម និងអាហារកែច្នៃ រួចងាកមកផ្ដោតលើអាហារសម្បូរជាតិសរសៃដូចជា បន្លែ ផ្លែឈើស្រស់ និងអង្ករសម្រូបវិញ។
ដើម្បីការពារសុខភាពឱ្យកាន់តែប្រសើរ លោកអ្នកអាចប្រើគ្រឿងទេសធម្មជាតិដូចជា ឈើអែម ជំនួសស្ករចម្រាញ់ និងបញ្ចូលអាហារប្រឆាំងការរលាកដូចជា ត្រីសមុទ្រ និងប្រេងអូលីវទៅក្នុងរបបអាហារ។ ការរស់នៅដោយមានតុល្យភាពអាហារូបត្ថម្ភ រួមផ្សំជាមួយការហាត់ប្រាណទៀងទាត់ គឺជាខែលការពារដ៏រឹងមាំបំផុតប្រឆាំងនឹងជំងឺដុំសាច់ និងជួយឱ្យសុខភាពទូទៅល្អមាំមួនជានិច្ច៕