​ញ៉ាំស៊ុត ១ គ្រាប់រាល់ថ្ងៃ​ ជំនួយខួរក្បាល ភ្នែកភ្លឺច្បាស់ និងស្បែកក្មេងជាងវ័យ!​

យោងតាមការផ្សាយរបស់សារព័ត៌មានបរទេស ស៊ុតមិនមែនត្រឹមតែជាអាហារសាមញ្ញនោះទេ ប៉ុន្តែវាគឺជា «កំពូលអាហារ» ដែលផ្ទុកជីវជាតិស្ទើរតែគ្រប់យ៉ាងដែលរាងកាយត្រូវការ។

ការទទួលទានស៊ុត ១ គ្រាប់ជារៀងរាល់ថ្ងៃ នឹងជួយឱ្យអ្នកមានអារម្មណ៍ឆ្អែតបានយូរ និងមានថាមពលពេញមួយថ្ងៃ ដោយសារប្រូតេអ៊ីនគុណភាពខ្ពស់ និងវីតាមីន B12។ ចំពោះអ្នកស្រឡាញ់សម្រស់ វីតាមីន B ក្នុងស៊ុតនឹងជួយឱ្យស្បែកស្រស់ថ្លា ព្រមទាំងពង្រឹងសរសៃសក់ និងក្រចកឱ្យរឹងមាំពីខាងក្នុង។

លើសពីសម្រស់ ស៊ុតដើរតួជា “អាហារខួរក្បាល” ដ៏អស្ចារ្យតាមរយៈសារធាតុ Choline ដែលជួយពង្រឹងការចងចាំ និងគ្រប់គ្រងអារម្មណ៍បានយ៉ាងល្អ។ សម្រាប់សុខភាពភ្នែក សារធាតុ Lutein និង Zeaxanthin ក្នុងផ្នែកលឿង ជួយការពារភ្នែកពីការខូចខាត និងជំងឺភ្នែកឡើងបាយតាមវ័យ។ បន្ថែមពីនេះ វីតាមីន D ក្នុងស៊ុត គឺជាជំនួយការពិសេសក្នុងការជួយឱ្យឆ្អឹងបឺតស្រូបកាល់ស្យូមបានកាន់តែរឹងមាំ។

ឈប់បារម្ភរឿងកូឡេស្តេរ៉ុលទៀតទៅ! ការស្រាវជ្រាវថ្មីៗបង្ហាញថា ការញ៉ាំស៊ុត ១ ទៅ ២ គ្រាប់ក្នុងមួយថ្ងៃ មិនត្រឹមតែមិនប៉ះពាល់ដល់បេះដូងទេ ប៉ុន្តែថែមទាំងជួយការពារបេះដូងតាមរយៈជាតិប៉ូតាស្យូម និងហ្វូឡាតទៀតផង។ ដើម្បីទទួលបានផលល្អបំផុត អ្នកគួរទទួលទានស៊ុតស្ងោរ ឬចំហុយ រួមជាមួយបន្លែបៃតង ដើម្បីឱ្យរាងកាយទទួលបានជីវជាតិពេញលេញ និងមាំមួនជានិច្ច​៕