យោងតាមការផ្សាយរបស់សារព័ត៌មានបរទេស ការធ្វើទឹកជ្រលក់កាពិឱ្យឆ្ងាញ់ មិនមែនត្រឹមតែបុកបញ្ចូលគ្នានោះទេ តែវាមានតិកនិកសម្ងាត់ចាប់ផ្ដើមពីការ អាំងកាពិ។
អ្នកគួររុំកាពិក្នុងស្លឹកចេក រួចយកទៅអាំងឱ្យឆ្អិនល្អជាមុនសិន ដើម្បីបំបាត់ក្លិនឆ្អាបរបស់បង្គា និងជំនួសមកវិញនូវក្លិនក្រអូបឈ្ងុយដែលជាដួងព្រលឹងនៃម្ហូបមួយមុខនេះ។ ដើម្បីឱ្យទឹកជ្រលក់មានពណ៌ស្អាតទាក់ទាញ អ្នកគួរប្រើម្ទេសក្រហមបុកជាមួយខ្ទឹមសឱ្យម៉ដ្ឋ រួចបន្ថែមត្រប់ពុតលំញងបុកបញ្ចូលគ្នា ព្រោះវានឹងជួយឱ្យពណ៌ទឹកជ្រលក់ប្រែជាស្រទន់ មិនខ្មៅអាប់អួ និងមានរសជាតិកាន់តែមានតុល្យភាព។
ចំពោះការផ្សំរសជាតិ ស្ករត្នោតដែលរំលាយរួចគឺជាជម្រើសល្អបំផុតដើម្បីកុំឱ្យកកជាដុំ ហើយអ្វីដែលត្រូវប្រយ័ត្នគឺ កុំប្រញាប់បន្ថែមទឹកត្រី ព្រោះកាពិមានជាតិប្រៃស្រាប់ទៅហើយ។ ជាចុងក្រោយ ចូរប្រើទឹកក្រូចឆ្មារស្រស់ និងទឹកឆ្អិនទុកឱ្យត្រជាក់ ដើម្បីឱ្យទឹកជ្រលក់មានភាពរាវល្មម និងមានរសជាតិជូរអែមឆ្ងាញ់ពិសា។
ការជ្រើសរើសកាពិដែលមានគុណភាពពណ៌ស្វាយស្រាល រួមជាមួយការអាំងឱ្យឆ្អិនឈ្ងុយ នឹងធ្វើឱ្យទឹកជ្រលក់កាពិរបស់អ្នកមានរសជាតិឥតខ្ចោះ ញ៉ាំជាមួយបន្លែស្រស់ ឬត្រីអាំង ឆ្ងាញ់រហូតដល់ថ្នាក់ចុងភៅអាជីពសរសើរមិនដាច់ពីមាត់៕