ការផឹកកាហ្វេឱ្យចំពេលវេលា មិនត្រឹមតែជួយឱ្យស្មារតីស្វាងល្អប៉ុណ្ណោះទេ ប៉ុន្តែថែមទាំងជួយការពារសុខភាព និងមិនរំខានដល់ដំណេកទៀតផង ។ តាមការណែនាំរបស់អ្នកជំនាញសុខភាព ពេលវេលាដែលល្អបំផុតមានដូចខាងក្រោម ៖
១. ចន្លោះម៉ោង៩:៣០ ដល់ ១១:៣០ ព្រឹក
នេះគឺជាពេលវេលាមាស សម្រាប់ផឹកកាហ្វេ ។
នៅពេលយើងទើបតែភ្ញាក់ពីគេង រាងកាយបញ្ចេញអរម៉ូនម្យ៉ាងឈ្មោះ Cortisol (អរម៉ូនដែលជួយឱ្យយើងស្វាង និងមានថាមពល) ក្នុងកម្រិតខ្ពស់បំផុត ។ បើអ្នកផឹកកាហ្វេភ្លាមៗនៅម៉ោង៧ ឬ ៨ព្រឹក ជាតិកាហ្វេអ៊ីននឹងទៅជាន់ជាមួយអរម៉ូនធម្មជាតិនេះ ដែលធ្វើឱ្យរាងកាយស៊ាំនឹងកាហ្វេអ៊ីន (ផឹកយូរទៅលែងសូវស្វាង)។ ការផឹកនៅចន្លោះម៉ោង ៩:៣០ ដល់១១:៣០ គឺនៅពេលដែលកម្រិត Cortisol ចាប់ផ្តើមធ្លាក់ចុះ ទើបកាហ្វេអ៊ីនចូលទៅជួយបង្កើនថាមពលបានចំគោលដៅ ។
២. ផឹកក្រោយអាហារពេលព្រឹក (៣០នាទី ទៅ១ ម៉ោង)
ការផឹកកាហ្វេទាំងពោះទទេ អាចធ្វើឱ្យជាតិអាស៊ីតក្នុងក្រពះកើនឡើង បង្កជាជំងឺក្រហាយទ្រូង ឈឺក្រពះ ឬធ្វើឱ្យញ័រទ្រូងចំពោះអ្នកដែលងាយប្រតិកម្ម ។ ការផឹកក្រោយញ៉ាំអាហាររួច ជួយការពារស្រទាប់ក្រពះ និងជួយដល់ប្រព័ន្ធរំលាយអាហារផងដែរ។
៣. មុនពេលហាត់ប្រាណ៣០ នាទី
ជាតិកាហ្វេអ៊ីនជួយបង្កើនល្បឿននៃការដុតរំលាយអាហារ (Metabolism) និងបង្កើនកម្លាំងសាច់ដុំ ដែលធ្វើឱ្យអ្នកហាត់ប្រាណបានយូរ និងដុតជាតិខ្លាញ់បានច្រើនជាងមុន។
អ្វីដែលគួរចៀសវាង៖
-កុំផឹកក្រោយម៉ោង ២ ឬ៣ រសៀល៖ ជាតិកាហ្វេអ៊ីនស្ថិតក្នុងរាងកាយយើងចន្លោះពី ៦ ទៅ ៨ ម៉ោង ។ បើអ្នកផឹកនៅពេលល្ងាច វាអាចនឹងរំខានដល់គុណភាពនៃដំណេក ទោះបីជាអ្នកអាចដេកលក់ក៏ដោយ ក៏ខួរក្បាលមិនបានសម្រាកពេញលេញដែរ ។
-កុំផឹកកាហ្វេលាយស្ករ ឬទឹកដោះគោច្រើនពេក ៖ ដើម្បីទទួលបានអត្ថប្រយោជន៍សុខភាពពិតប្រាកដ កាហ្វេខ្មៅ (Black Coffee) ឬកាហ្វេលាយទឹកដោះគោស្រស់គ្មានស្ករ គឺជាជម្រើសល្អបំផុត ។